احداث وقضايا

من طرف ???? الخميس أبريل 23, 2009 7:19 pm

التوعية بخطورة انفلونزا الطيور لازم تتعمل للطيور نفسها لان الواضح ان الناس مش قادرة تستوعب الموضوع، علشان كده الاعلانات لازم تخاطب الطيور انها تخلي بالها من الانفلونزا وما تلعبش مع بعضيها ولما تحس انها مريضه تبلغ عن روحها.
-----------------------------------------------

مصر بتدعو ليبرمان لزيارتها ودعوه رسمية سلمهالوه مدير المخابرات في القدس، مش ليبرمان ده برضه اللي شتم مصر ولا احنا بنتعامل مع اسرائيل بمبدأ اللي بيشتم ربنا يسامحه والشتيمة مبتلزقش
-----------------------------------------------

مش عارف يا جماعة اية اللى حصل لينا فى مصر وزارة الصحة اعلنت عن الاصابة رقم 66 بانفلونزا الطيور بالرغم من اعلانات التوعية، يعني نعمل ايه تاني عشان الناس تاخد بالها، نحط انذار وسنتر لوك على كل فرخة
------------------------------------------------

في عام 1956 حاربنا انجلترا وفرنسا وإسرائيل وفي عام 1973 حاربنا إسرائيل ومن خلفها أمريكا واليوم نحارب محطة تليفزيون قطرية وحزب لبناني
----------------------------------------------

اكبر كذبة عشناها ايام الدراسة اللي قريناه في مناهج التاريخ ان العدو الاول لمصر هي اسرائيل اللي حاربتنا 4 حروب واحتلت سيناء وقتلت عشرات الالاف من ابناءنا، لكن الحمد لله اكتشفنا الحقيقة وعرفنا ان اعداءنا الحقيقين هما سوريا وقطر وايران وحماس وحزب الله
------------------------------------------------

وزارة الداخلية مشكورة عاملة على موقعها على النت صفحة لتلقي شكاوى المواطنين والاجانب، لكن الغريب ان الجزء بتاع الاجانب بس هو اللي شغال والجزء بتاع المواطنين عطلان، فهل هما فاكرين ان ماعندناش شكاوي، ولا المقصود اننا ننسى انهم يسمعونا؟
-----------------------------------------------

بعد ما طلعت علينا وزاره الكهرباء والسيد حسن يونس وقالك هنبيع ونخصخص الكهرباء، يا ترى المستثمرين الجدد هيوفروا كروت شحن الكهرباء بأسعار مهاودة ولا نقضيها بطاريات
---------------------------------------------
بعد حصول الدكتور محمود ابو زيد وزير الري السابق على وسام الجمهورية ، الناس زاد استغرابها، هو كويس عشان كده بيكرموه ولا وحش وعشان كده شالوه من الوزارة؟؟ ، الحكاية دي عاملة زي موقف اللمبي في اللي بالي بالك .. خد الوسام ده وسكتم بكتم؟؟
-----------------------------------------------------
في 2008 قال الكابتن حسن شحاتة ان من اسرار فوز منتخب مصر بكأس الأمم سماع اللاعبين أغنية مشربتش من نيلها لشيرين، ويبدو ان سر خيبة التعادل أمام زامبيا هو إن شحاتة غير الأغنية وسمعهم أغنية يا مصراوية لزينة
------------------------------------------------------
بمناسبة اضراب 6 ابريل المفروض الوزرا والمسئولين يعملوا اضراب هما كمان، مش كل شوية احنا نعمل اضرابات وهما يفضلوا يتفرجوا علينا
ا-----------------------------------------------------

بعد غرق 7 صيادين على السواحل المصرية صرح نقيب الصيادين لاحد البرامج انها حادثة متكررة وانهم يستلمون رسائل استغاثة من تلك المراكب ولكن خفر السواحل او حرس الحدود لا يمتلك هليكوبتر لانقاذهم وليس معهم سوى زوارق لايمكنها التحرك فى الاجواء العاصفة .. طيب ياخدو هليكوبتر احمد السقا اللى بيمثل بيها ويبقو يكتبو فى اخر الخبر شكرا لأحمد السقا على تعاونه مع خفر السواحل.
---------------------------------------------------------------
أحمد عز اجتمع بمسئولي البترول وطلع بعدها وقال لا تفكير في رفع أسعار البنزين، والنبي يا خونا حد يفكر الجماعة دول بحاجتين، أولا ان البترول سعره نزل في العالم كله لتلت تمنه تقريبا، الحاجة التانية والاهم .. ان احمد عز مش وزير البترول.