صباح الخير يامصر

من طرف ???? الإثنين أغسطس 10, 2009 3:06 pm

صباح الخير يا مصر .. صباح الخير على الناس المرهقين من عناء الحياة والدايرين في الساقية اللي منصوبة لهم من سبعة الاف سنة .. الناس اللي عايشة اليوم بيومه ..كل أملها يعدي من غير اي خساير .. مابتفكرش في بكره عشان ماتتقهرش... مابتفكرش في النهارده علشان ماتتنقطش ..

صباح الخير على ضحكة عالية في قهوة شايها مايتشربش .. على شاب بيقوم لست كبيرة في الاتوبيس.. على كوباية شاي باللبن وحتة بقسماط بعد صلاة الفجر جنب السيدة نفيسة .. على قهوة في الحسين مبيعديش عليها حسن بشندي .. على سينما زحمة والضحك طالع من القلب للركب .. على سور الأزبكية وكتبه المعتقة ..

على عشاق فقرا مش لاقيين شقة محافظة فبيخطفوا الفرحة متداريين في صخور الكورنيش ورا شجر النيل .. على صوت الشيخ السيد متولي وهو بيقرا سورة يوسف وبيخلينا نعيط على سيدنا يعقوب اللي ابيضت عيناه من الحزن .. صباح الخير على كل الناس اللي بتشقى عشان تجيب اللقمة من بق الاسد ومراته .. على عربيات الكبده والسجق لحمة الفقير وعربيات الدوم تفاح الفقير وعربيات السوبيا خمرة الفقير.. على طبق الكشري خالي العدس ورد زياده وغرقان في الدقة .. على فطاطري الحسين اللي سمى نفسه بيتزا الحسين فباظ من ساعتها..

على العدوي بتاع ميدان الجيش يعني احلى رصة فول وطعمية بمستلزماتها وبرخص التراب .. على أفران العيش في اسكندرية .. على البلكونات اللي مافيهاش كراكيب ولا بصل ولا توم .. فيها كرسيين وكوبايتين شاي وبصة رضا وآهة شوق .. على كل صالة بتلم الناس اللي مش عارفة تتلم على نفسها .. على كل نكته قبيحة تتقال بصوت عالي .. صباح الخير على الطاهرة رئيسة الديوان ودراويشها وسجاد جامعها .. على روح سيدنا الحسين اللي مش مدفون هنا اساسا ..

صباح الخير على كل سطر كتبه نجيب محفوظ وكل شجرة سقاها علاء الديب وكل فيلم كان هيعمله احمد زكي وكل كرسي ماتضايقش لما صلاح جاهين قعد عليه .. صباح الخير على الناس اللي واقفة في طابور حكومة رخم بتتخانق عشان تسلي بعضها .. على مدرجات الدرجه التالتة وناسها اللي مش هنا اساسا ..

على الاهلي لما يسكع الزمالك ستة وساعات اربعة وساعات اتنين .. صباح الخير على كل ايدين بتسلم عليك باهتمام بعد الصلاة.. وعلى كل امام ما بيطولش في الوقوف ويطول في السجود .. صباح الخير على سينمات الدرجه التالتة والفاكهة اللي مش مرشوشة مبيدات وسعاد حسني وهي بتغني انا ضاع مني حاجه كبيرة اكبر من اني اجيب لها سيرة .. صباح الخير بالليل على فرشات جرايد الطبعة الاولى وحفلات الميدنايت والقهاوي المناوبة .....

على العيال وهي بتهز اكياس الكشري الصبح وهي رايحة المدرسة .... على بتوع الزلابية اللي واقفين قدام المدارس خايفين من البلدية ... صباح الخير على اكشاك السمك في ابو قير والترام الاصفر وسيدي البوصيري وبردته والمراجيح اللي ورا ضريحه .. وعم نفنف بتاع الكبدة في المنشية وطعمية ابو احمد الاكتع في شارع عمر بن الخطاب .. صباح الخير على وقفة النواصي والقمم والخناقات " البوق " اللي الناس بتفش فيها غلها وبتوفر مادة فرجه للواقفات في البلكونات ... صباح الخير على كل جميلة تغري باثم النظرة الثانية والتاسعة ..

صباح الخير على الناس اللي بتكوي قمصانها وتبص على المراية قبل ماتنزل .. على شوارع الزمالك وجاردن سيتي والمعادي اللي تشرف وتفتح النفس للحياة وعلى كل اللي بيمشوا فيها وبيفرحوا للي ساكنين فيها .... صباح الخير على حب الجامعة ومظاهرات الجامعة وكل افيه اتقال على اي معيد غتت في اي سكشن ...

صباح الخير على الاوض اللي فوق السطوح والشقق المفروشة والايجار اللي مابيتكسرش .. على صينية الاكل اللي بتيجي لك من الجيران قبل ما يتفقوا معاك تدي ابنهم درس... على قران الفجر وصوت النقشبندي وهو بيقول مولاي اني ببابك قد بسطت يدي ... صباح الخير على الجمعيات اللي ساتره الشعب المصري .. على تمييلة الصاحب على صاحبه في ساعة الزنقة ..

صباح الخير على الخير على ام حمدي عبد الرحيم اللي بتحب جمال عبد الناصر وام ايمن عبد الهادي اللي بتعمل رز مسكر وملوخية تضيع مستقبلك , وام على رجب اللي ماشفتش البحر الا في عربية الاسعاف اللي خدتها على المستشفى ...صباح الخير على كل نجع وكفر مايكفرش من العيشة .. صباح الخير على الكنايس اللي شكلها حلو ,, على الاتوبيس النهري لما يكون نضيف..

على عم فاروق ونصبة الشاي بتاعة كوبري عباس .. على كل زوجه مابتنكدش على جوزها , وكل راجل مابيستقواش على ولية وعلى كل ندهة لبابا وكل لعبة لبنوته ومسدس ميه لحماده ... صباح الخير على كراتين الجهاز المتعانة فوق الدواليب .. واحلام الجواز المتحاشة تحت البطاطبن .. صباح الخير على عامود السواري والفاتحة اللي بقراها وانا ببص من تحته على تربة ستي اللي قالتلي وانا رايح الجامعة اول مرة "يابني البلد بلدهم يعملوا فيها ما بدالهم !" صباح الخير على لمة صحابي في القهوة وشتايمهم فيها علشان بطلت اجي .. صباح الخير على دعوة ربنا يكفيك شر طريقك ..

صباح الخير على عبد الناصر قبل مايبقى فرعون وعلى الشعراوي وهو بيقول اذا كنت قدرنا فليعنا الله عليك , وعلى عبد الحليم وهو بيعيد كوبليه حبيبي والله لسه حبيبي والله , وعلى أم كلثوم وهي بتقول تهون عليا الروح لو فارقت جنبي , وعلى محمد فوزي وهو بيقول اي حاجه يعوزها .. صباح الخير على مرجلة ابراهيم عيسى الذي اخرجني من الظلمات الى النور.. على مسلسل ارابيسك وفيلم حب في الزنزانة وفينالة الكيت كات ونجيب الريحاني وهو بيغني حتى الفيران اشتكت من قلة فرافيتي ... على عم حجازي اللي سابهالنا مخضرة وراح طنطا .. على محمود عوض اللي قاعد في البيت .... على بهاء طاهر اللي بيصلب طوله علشان يروح المظاهرة ... على فاروق عبد القادر وصحبته .. على حمدي عبد الرحيم واكرم القصاص وقهوة المنظر الجميل والايام اللي كنا مش لاقيين ناكل فيها بس كان عندنا شاي وسكر كتير.. صباح الخير على اصحابي ولاد الاصول اللي مبيخفوش من اي حاجه بكتبها ..
صباح الخير على بنتي في المستقبل اللي لو ماشفتهاش بتكبر .. قولولها ان ابوكي كان راجل جدع . .

معلش طولت عليكم الصباح

من طرف أحمد عادل الإثنين أغسطس 10, 2009 5:58 pm

صباح النور يا حبيبي

لا بجد موضوووووووع 100 100
من افضل مواضيعك ومن افضل مواضيع المنتدى على الاطلاق بس هو فيه حاجه نقصه
صباح الخير على حازم امام لما يبهدل مدافعى الاهلى وصباح الخير على عودة ميدو وعمروذكى اللى اوجشت فى قلوب الاهلوية الرعب وكل عام وانتم بخير

من طرف ???? الإثنين أغسطس 10, 2009 11:57 pm

جزاك الله خيرا يا محمد على الموضوع الجمييييييييييييييييييييييييييييييييييييييييييييييل جدااااااااااااااااا

وصباح الخير على العيش والحلاوة وعفاريت الفجر

متنساش تاخد معاك بيروسول علشان البراغيت هناك كتيييييييييييييييير

ههههههههههههههههههههههههههههههههههه

بجد موةضوع جميل جدا

من طرف Genol الثلاثاء أغسطس 11, 2009 12:24 am

بجد أجمل موضوع فى المنتدى تسلم إيدك يا محمد

شكراً على الموضوع الجميل ده

بجد شيق كده و جديد من نوعه

هي دي بقى الكتابة الساخرة

أهم حاجة إنه يضحك في حاجات كتير ضحكتني زي مثلاً

صباح الخير على كل الناس اللي بتشقى عشان تجيب اللقمة من بق الاسد ومراته .. على عربيات الكبده والسجق لحمة الفقير وعربيات الدوم تفاح الفقير وعربيات السوبيا خمرة الفقير.. على طبق الكشري خالي العدس ورد زياده وغرقان في الدقة .. على فطاطري الحسين اللي سمى نفسه بيتزا الحسين فباظ من ساعتها..

و كمان

على العيال وهي بتهز اكياس الكشري الصبح وهي رايحة المدرسة .... على بتوع الزلابية اللي واقفين قدام المدارس خايفين من البلدية ... صباح الخير على اكشاك السمك في ابو قير والترام الاصفر وسيدي البوصيري وبردته والمراجيح اللي ورا ضريحه .. وعم نفنف بتاع الكبدة في المنشية وطعمية ابو احمد الاكتع في شارع عمر بن الخطاب .. صباح الخير على وقفة النواصي والقمم والخناقات " البوق " اللي الناس بتفش فيها غلها وبتوفر مادة فرجه للواقفات في البلكونات ... صباح الخير على كل جميلة تغري باثم النظرة الثانية والتاسعة ..

ههههههههههههههههههههه
مين عم نفنف ده ؟
ههههههههههههههههههههه
و أبو أحمد الأكتع
ههههههههههههههههههههه

صباح الخير على حب الجامعة ومظاهرات الجامعة وكل افيه اتقال على اي معيد غتت في اي سكشن

على كل زوجه مابتنكدش على جوزها , وكل راجل مابيستقواش على ولية وعلى كل ندهة لبابا وكل لعبة لبنوته ومسدس ميه لحماده ...

هههههههههههههههههههههههههه
حماده إنت
عينك يا حمادة و التليفزيون

لا بس موضوع جااااااااااامد يعني

شكراً

صباح الخير يامصر

صباح الخير يامصر

صباح النور يا حبيبي

رد: صباح الخير يامصر

رد: صباح الخير يامصر

رد: صباح الخير يامصر