الكوسة ...اعرف تاريخك وبلاش اقول كوسه

من طرف Genol الجمعة مايو 01, 2009 4:38 pm

اتضايقت اوى لما لقيت ناس كتير مش عارفين يعنى ايه كوسه

ويقوللك ده نجح كوسة

وده جاب تقدير كوسة

ودى انتخابات كلها كوسة

و كفاية كوسة

و حملة ضد الكوسة

و لا للكوسة لا للكوسة

و بعد كل ده تلاقى الواحد مش عارف اصل الكلمة ايه

فانا بحثت في كتب التاريخ لحد ما توصلت لاصل تراث الكوسة ده

كان يا مكان في قديم الزمان - مش زمان اوى يعنى -

مثلا ايام المماليك او العثمانيين كدة

كانت القاهرة ليها سور كبير

و كانت الاسوار بتتقفل الساعة 8 بالليل و ممنوع اي حد يدخل بعد كدة

- شايف كان فيه نظام ازاى ما شافوهاش و هى على البحرى دلوقتى -

المهم

فكان اي حد من الفلاحين يحاول يدخل بعد الساعة 8 ميعرفشى خالص مهما كان

الا الفلاحين اللى بيزرعوا كوسة !!

و ده بسبب زراعى جدا وهو ان الكوسة ما ينفعشي تتحصد الا بالليل بعد 12 كدة مثلا

فكان الباب يخبط

طق طق طق

مييييين ؟

انا

انت مين ؟

انا فلان الفلانى اتأخرت و جيت اهو

لا مانتش داخل و بوووووووووووم طاخ طيخ طووووخ

بعدها يخبط الباب

طق طق طق

ميييييين ؟

انا

انت مين

كوووووسة

يقوم الباب مفتوح

ومن يوميها و الكوسة بقت رمز من رموز الوطن قصدى رمز للمحسوبية وخير مثال لها

يلا بقى اعرفوا تاريخكوا و ان الكوسة دى حاجة وطنية لازم نفتخر بيها

يمكن الموضوع مش مكانه هنا بس انا حطيته هنا كوسة

تحياتى للجميع

بس تعرفوا أنا موش بحب الكوسه أصلا