النظافة والاخلاق

من طرف ???? الجمعة يونيو 26, 2009 11:18 pm

ساعات كده كنت أبقى ماشى فى الشارع فأشوف صندوق زبالة مكتوب عليه "حافظوا على نظافة مدينتكم"، المهم بقى إنك تلاقى الصندوق ده مكسر ولونه مسود والزبالة مرمية حواليه و"حدث ولا حرج" عن كمية الدبان اللى عمال يهف على الصندوق وعلى الزبالة اللي جواه.مثال بسيط ومنتشر وأكيد كتير مننا شافوه ولاحظوه وغالباً كان لينا دور في وصوله للمرحلة دى كمان. للأسف ده مثال بسيط لواقع الاهتمام بالنظافة العامة والشخصية فى بعض الأماكن.

السؤال هنا بقى، إيه الحل؟
بس عشان نعرف نجاوب على السؤال ده إحنا محتاجين نجاوب على سؤالين تلاتة كده الأول عشان نقدر نقول حل ينفع ننفذه مش حلول نظرية وخلاص...

خلينا الأول نعرف يعنى إيه نظافة؟
هل هى مجرد أفعال أو إرشادات نمشى عليها؟ هل مثلاً "الإنسان النظيف" هو اللى يبقي بيلمع كده زى أفلام الكارتون؟ طب هو ليه الفترة دى إنتشرت فى العالم الأمراض المتعلقة بالنظافة زى أنفلونزا الطيور وأنفلونزا الخنازير؟

لو رحت دلوقتى وعملت بحث على الإنترنت عن تعريف أو معنى كلمة نظافة، هتلاقى معانى وتعريفات كتير جداً وهتلاقى كل تعريف بيتناول الموضوع من جهة مختلفة، يعنى مثلا هتلاقى تعريف بيركز على النظافة العامة، وتعريف تانى يكلمك على النظافة الشخصية، وتعريف تالت يكلمك على نظافة النفوس، وحاجات تانية كتير...

لكن كلنا فى النهاية بنحكم على النظافة من خلال الشكل الخارجى. نقوم لما نشوف ناس نقول: "الله... الإنسان ده نظيف ومهندم جداً" وناس تـانية نقول عليهم: "...........؟" إنتوا فاهمين قصدى، إنما بردوا أكبر مثال على إن مفهوم النظافة الفردية مش مقياس هو إنتشار إنفلونزا الطيور وإنفلونزا الخنازير حتى فى أكثر الدول تقدماً. ده لأن النظافة، في رأيى، هي مفهوم "متكامل"... يعني ما ينفعش أقول مادام أنا نظيف ما يهمنيش العمارة اللى أنا قاعد فيها... أو الحى ... أو البلد... أو العالم كله... العالم كله؟.... أيوه العالم كله... لأن زى ما قلت لك قبل كده النظافة مفهوم متكامل.... والدليل علي كلامى هو إنتشار إنفلونزا الطيور و إنفلونزا الخنازير فى أكثر الدول تقدماً.... ده دليل على إنى لو بصيت للنظافة بمنظور فردى ضيق مش ممكن هأحمى نفسى.... أو بلدى.... بالعكس لازم أبص لها بمنظور واسع ومتكامل... علشان أقدر أحمى نفسى وأولادى والعالم اللى أنا عايش فيه.

أنا عارف دلوقتى إنكم بتقولوا: يا عم، إنت لا جوه عاجبك ولا بره عاجبك؟
أنا كل اللى قصدى عليه واللى حتى الغرب بكل التكنولوجيا والتقدم اللى وصله ده مش قادر يفهمه هو إن النظافة دى قبل أى حاجة أسلوب حياة، المجتمع النظيف مش لازم يبقى مجتمع غنى، بس أهم حاجة إنه يبقى مجتمع متعاون وعنده كده زى ميثاق تعاون بين كل أفراده إن إحنا هنكمل بعض عشان مجتمعنا يبقى نظيف، من أول العالم لآخره.... من الشوارع والبيوت لحد أدق التفصيلات فى النظافة الشخصية.

طب يعنى الحل إيه؟
مستحيل إن إحنا نروح نلم الشعب المصرى أو العالم كله ونخليه يمضى على الإتفاق بتاع التعاون على النظافة ده، بس ممكن نزرع فى نفسنا وفى أولادنا مبدأ النظافة المتكامل ده، وأولها أبدأ بنفسك. صدقونى يا جماعة لما أخوك يشوفك فى البيت بتحافظ على نظافة نفسك وبيتك وعمارتك ومدينتك، ولما زميلتك فى الشغل تشوفك بتتقنى عملك فبالتالى بتحافظى على نظافة ونظام شغلك، ولما واحد ما يعرفكش فى الشارع يلاقيك بتحافظ على نظافة الشارع مش بس من الزبالة إنما كمان من الأخلاق والأفعال الغلط، هتلاقى تأثيرك هيبقى أقوى من لو قعدوا يعملوا حملات عن النظافة لأنك هتبقى مثال إيجابى حى مش كلام بيتقال فى ميكروفون والناس تسمعه وتصقف له وترّوح ولا فاكره منه حاجة.

وعلى رأى غاندى " كن التغيير الذى تحب أن تراه فى الآخرين"