ليه الدكتور نسى الفوطة؟!!!

من طرف ايمى الثلاثاء أكتوبر 27, 2009 2:57 am

ليه الدكتور نسى الفوطة
وناس واقفة بتتريأ ومبسوطة
وناس تانية بتستغرب ومنقوطة
ليه الدكتور نسى الفوطة

وهو يا عينى كان واقف
ووشه احمر ولا القوطة
وقال يا جماعة سامحونى
وقبل ما تيجوا تلومونى
تعالوا احكيلكوا انا حكايتى
وبعديها ابقوا حاكمونى

سنين فاتت فى ثانويه
عرق دامى وكفاح ودموع
وبعد المعركة الحامية
قدرت انجح واجيب مجموع

اخيرا حلمنا اتحقق
هخش الطب وادكتر
رسالة جميلة ومعاها
مقام عالى وفلوس اكتر

فى اول يوم لبست جديد
وشلت البالطو رحت لاقيت
زمايلى اتحشروا فى مدرج
عامل ولا علبة الكبريت
ولكن برضه ميئستش

دل دكتور فضل يشرح
كلام كان صعب ولاتينى
وانا متنح ومش فاهم
لقيت النوم غلب عينى
ولسه انا برضه ميئستش

وقلت مادام ضاع النظرى
هظبط نفسى فى العملى
جريت عالمشرحة بسرعة
لكن كالعادة خاب املى
دخلت لاقيت 200 واحد
بيتانقم على الجثة
وناس واقفة من الزحمة
على كتافى ومش حاسة
ولسه انا برضه ميئستش

وطبعا حسوا بظروفنا
وحطولنا امتحان فوازير
وكل اما اجى احل سؤال
اقف قدامه زى الزير
ولسه انا برضه ميئستش

وجينا فى لجنة الشفوى
وكان قدامى واد كوسة
خد الفول مارك مالدكتور
واخد فوقهم كمان بوسة
ولسة انا برضه ميئستش

سنة بتمشى وسنة بتيجى
مقالب بعدها مقالب
زمايلى اتعينوا وقبضوا
وانا شايل لقب طالب
ولسة انا برضه ميئستش

كبرنا شويه وقالولناخلاص
دلوقتى شوفوا حالات
ورحنا نشوف وكالعادة
دا كله بيطلع اشتغالات
ولسه انا برضه ميئستش

لحد ما خلصم السبعة
وقلت خلاص هروق وهعيش
وقبل مافوق من الصدمة
خدونى عشان اخش الجيش
ولسة انا برضه ميئستش

وقعت هناك فى ايد ظابط
ظغرلى وقال يا بسكوتة
احب ابشرك انك
معايا هتطفح الكوتة
ولسه انا برضه ميئستش

خلاص السبعة بقوا عشرة
ولسه انا ماشى جنب الحيط
وبان السن على وشى
وشعرى ابيض واصلعيت
ولسه انا برضه ميئستش

وبعد ما قلت كفارة خلاص
هارتاحلى بقى كام يوم
لاقيتهم تانى وخدنى
عشان تكليفى فى السلوم
ولسه انا برضه ميئستش

وقلت هناك هاد قرشين
اكل منهم واجيب لبسى
فوجئت يا عينى بمرتب
مبيكفيش ولا بشبسى
ولسه انا برضه ميئستش

وبعد العمر ده كله
رمونى فى وحدة صحية
نسيت الطب انا فيها
وبقيت زى التمرجية
ولسه انا برضه ميئستش

وادينى بعيش وهعمل ايه
ماليش ولا حول ولا قوة
وحيد غلبان وحتى مفيش
جواز على نفقة الدولة
ولسه انا برضه ميئستش

قام الدكتور صعب عالناس
وفضلم يبكوا على حاله
وحتى الفوطة نسيوها
ولموا فلوس وسابوهاله
وقال دكتورنا عالفوطة
تعالوا هشلها انا بكرة
لكن اهل المريض قالوا
خلاص...هنسبها للذكرى