حب من طرف خايب !!!!!!!!

حب من طرف خايب

هو ليه دايماً عندنا كرم في مشاعرنا ؟!!!!!!!!!!!!!!!!!!
ليه لما نقابل شخص و نعجب بيه و نحبه نكون مستعدين ندي له عمرنا ، حتى لو مش حاسس بينا و لا واخد باله مننا و لا فارقين معاه أصلاً ؟! و مع ذلك بنفضل مستمرين في تضييع مشاعرنا ، و مستمرين نوظف إحساسنا في المكان الغلط ، و مع الشخص الغلط ؟! ليه نفضل حاطين عنينا عليه طول اليوم ، مع إنه مااهتمش حتى يقول لنا صباح الخير ؟!!!!!!!!!!

ليه لما نشوفه جسمنا يتنفض و نسمع دقات قلبنا حققت رقم قياسي ، و هو واقف قدامنا و كأنه مش شايف حد ؟!!!!!!!!!
ليه يشغل بالنا ليل نهار و احنا مش متأكدين حتى إنه فاكر اسمنا ؟!!!!! ليه نفضل سهرانين طول الليل في البلكونة مستنين منه طلة أو نشوفه داخل أو خارج و هو كل مرة بيخرج يقفل البلكونة بعد ما يقول لنا مساء الخير بعد إذنك .
ليه نفضل طول اليوم بنفكر له إزاي يطور شغله و إزاي يبني مستقبله ، و هو عمره ما سألنا عن كليتنا و لا عاملين إيه في شغلنا ؟!!!!!!!!!!!!!!!

ليه دايماً عندنا إحساس إن عدم اتصاله بينا عشان رقمنا ضاع منه ، و هو هيموت و يلاقيه ؟! ليه بنطير من الفرح أول ما بنشوف اسمه ظهر على الموبايل و هو عمره ما اتصل بينا غير عشان يسألنا عن حاجة ؟! ليه بنعتبر نظرته لينا دي أكبر أمنياتنا ، و يا سلاااااااااام لو ضحك !!!!!!!!
ليه عمره ما علق على لبسنا أو شكلنا الجديد ، و مع ذلك بنحضر لليوم اللي هيشوفنا فيه قبلها بيومين ؟!!!!!!!!!

ليه دايماً نشكر و نمدح فيه ، و هو عمره ما قال لنا كلمة حلوة ؟! ليه دايماً هو أول واحد نفكر نبعت له رسالة في كل مناسبة ، و هو نادراً ما بيرد عليها ؟! ليه كل ما بيغلط في حقنا بنخلق له ألف عذر و سبب من غير ما هو حتى يتكلم ، و كأننا مش عايزين نتعبه بالاعتذار ؟!!!!!!!!!!

ليه احنا دايماً شايفينه نازل من السماء و هو على طول شايف كل تصرفاتنا غلط ؟! ليه دايماً بنقدم سعادته على حسابنا ؟! ليه بنحاول دايماً نهرج معاه و هو مصمم يخلي كلامه رسمي ؟! ليه مابننساش أي لحظة أو موقف بينا ، و هو مش فاكر اتعرفنا على بعض ازاي ؟!!!!!!!!!!

ليه دايماً نكون أول حد يجيب له هدية في عيد ميلاده و هو عمره ما سألنا عن عيد ميلادنا إمتى ؟! ليه بيتأخر عن مواعيدنا و احنا بنكون جايين قبلها بساعة ، و بمجرد ما بنشوفه بننسى الوقفة لساعات في الشمس ؟! ليه دايماً بنكون مش عايزينه يعيب عن عنينا لحظة ، و هو دايماً شغله و التزاماته أهم ؟!!!!!!!!!!!

ليه دايماً بنكون حريصين نسمع صوته و نتطمن عليه كل شوية ؟! ليه بنفضل على كده لحد ما يجيي يوم يقابلنا في الشارع ، و يقولنا " إن شاء الله هتبارك لي قريب " فنرسم على وشوشنا ابتسامة مفضوحة و نقول له " بس ابقى اعزمنا " .

هو احنا ليه بنعذب نفسنا و نحب من طرف واحد ؟!!!!!!!!!

مهاب حسين

مجــــــــلــة : " كلـــــــمتنا "