يوم الأرف تاين

من طرف سلمى زهو الأربعاء فبراير 17, 2010 4:49 pm

من كام يوم كان يوم فزيع جداً خالص،كان يا إخوانا يوم( الفلانتين) العزيم واللى بحب أقول عليه من وجهه نظرى كواحده مش إتيكيت يوم (الأرف تاين)، الواحد جاله ضغط والمرارة بدأت تشاور نفسها والمرحله الجايه ربنا يستر علينا من اللى بقينا بنشوفه فى شوارعنا وأى
مكان بنروحه ،وبحمد ربنا إنه عيد المايصين دة جه فى الأجازة لإنه جامعتنا الحبيبه بتبقى تحفه فى اليوم دة دايماً.
بتبقى حاجه تفتح النفس لإنك تنحرف أقصد يعنى تدور على حد يديلك حاجة أحمرة ولا يفتكرك حتى بماسيج كميله ولا أى حاجة وخلاص ،ومن أول اليوم دة ببدأ آخد بالى من كل اللى بيحصل حواليا جداً أصلى من النوع اللى مبيحبش يريح نفسه ويخليه فى حاله ،بحب أوى أنا وصحبتى نختار مكان جنب أتنين لونهم أحمر وجنبهم هدايا ونروح قاعدين، ونشوف بقى إيه المختلف اللى بيحصل عن أى يوم عادى .
وفعلاً والله يا إخوانا والحق يتقال يعنى بييكون يوم مفتوح خالص لأى حاجة بجحه وتافهه ،وتلاقى الجامعه متقسمه إتنين إتنين والإتنين ماسكين هدايا ويروحوا ماشين شويه وبعدين يقعدوا (معلش أنا بحب التفصيل) وبعدين بقى أول حاجة تحصل يبصوا بصه غريبه الشكل لأى واحدة قاعدة مع صحبتها وكأنهم بيقولوا ياختى متقومى من هنا مش لاقيه غير الحته دى ؟؟!!
وأنا طبعا بكل رخامه مبقومش لأنى أصلاً هنا مخصوص علشان أحرق دمهم ،وآدينى بشوف وبتفرج على الإحتفال، ويروح البيه الكوتوموتو أبو بنطلون واقع وشعر واقف متر فوقيه وسلسه فى رقبته وحاجات غريبه فى ايده وأكيد بعد دة كله نتوقع إنه أقل واجب يبقى إسمه ميمو قايل :هابى فلانتين داى يا بيبى .
وتبص بقى للبيبى وهى بترد ياااااااااااه بت ماشاء الله نفسى أعرف الست الوالدة كانت فين وبنتها نازله من باب الشقه ؟!! ، بلاش إنفعل ويلا هعد من واحد لعشرة أممممممممم ، تروح بقى هى :هابى فلانتين تو يو يا ميمو.
وميمو يقوم قايل :انا جبت لك هديه على قدى يا توتى بس يارب تعجبك (ويقول فى سره فين هديتى أنا يا حجه)...تروح توتى مكسوفه قال يعنى وش كسوف: الله يا بيبى دى جامدة موت طحن..وتقوم مديه ميمو هديته .يقول ميمو: هديتك هايله يا توتى ..بكد بكد ميرسى بكم ، وأكون أنا خلاص فاضل لى دقايق وأقوم أدور على أى طوبه وأبطح بيها ميمو وتوتى..
وطبعاً عيد الحب دة فسحه ،يعنى أى حاجة تتعمل فيه متاحه ومباحه ومفيهاش أى بجاحه ،يعنى بردوا تشوف حاجات ما يعلم بيها إلا ربنا وماشيين مشبكين إيديهم وعااااادى والدنيا جميله والجو ربيع وما خفى كان أعظم والله.
أنا على فكرة مش ضد إنه يكون فيه يوم جميل نجدد فيه حبنا لبعض، بس يوم مش عيد ، ويوم كل واحد غير التانى يعنى مش يوم موحد بتاريخ مقدس ،وبعدين يا جماعه يا مسلمين دة عيد إسمه الأساسى(عيد القديس فلانتين) بالله عليكوا يرضى ربنا نعمله عيد لينا ونحتفل بيه وكأنه من أعيادنا؟!!
وبعدين سبحان الله دايماً تلاقيه بين الشباب والبنات اللى هما صحاب وخلوا بالكم من صحاب دى يعنى لا هو فارق معاها ولا هى فارقه معاه ، يعنى مفيهاش حاجة لما الكوتوموتو يروح يدفع كام جنيه علشان يجيب للكتكوته حاجة علشان تفضل مصاحباه ودى والله جمله سمعتها من ولاد قالوا إحنا بنعمل كدة علشان كذا وكذا .
يعنى فين عيد الحب دة بين اى إتنين متجوزين؟!! لاعمرى شفت واحد داخل بيته وجايب لمراته بوكيه ورد أحمر ولا دبدوب ولا حتى شبشب بفينكه .
أنا بقول كويس أوى إننا نحب بعض ونحب نفسنا ونحب أهلنا بس حب يرضى الله وحب فى الله والحب اللى كدة هو اللى بيدوم وبيبقى وبيكبر وربنا بيبارك فيه ،نتقى الله يا شباب ويا بنات وكل واحد يعرف إن ليه أخت وليه أم وفى من الأيام هيبقى ليه بنت يعنى يفكر أوى فى بنات الناس وبلاش يظلمهم.
وكل بنت تعرف إن هى عين أهلها وكل ما ليهم وإن ثقه أهلها فيها مش ببلاش ،وكفايه أوى نظرة حب من عينيهم وهما عارفين قد إيه بنتهم دى كبيرة أوى فى نظرهم وفى نظر كل الدنيا .
أتمنى بجد إننا نعبر عن حبنا لبعض بطريقه غير (الأرف تاين ).

من دااااااااخل مدونتى

من طرف محبة مصر الأربعاء فبراير 17, 2010 9:44 pm

شكرا ليكى يا سلمى على الموضوع
وفعلا احنا المفروض كل يوم عندنا يبقى يوم حب
وياريت نتعلم الحب الحقيقى من سيرة الرسول صلى الله عليه وسلم

هايل يا سلمى برافو عليكي احب انا المواضيع دي
انا بقى قضيت اليوم ده في البيت و الحمد لله احلى حاجة و الله
بس في اليوم اللي قبليه جبت لنفسي بلارينة حمراااااا هدية امال ايه هو انا شوية في البلد دي و لا ايه و كنت هاجيب علبة حمرااا و احطها لنفسي فيها بس طنشت بقى و ألاقي يا اختي و انا مروحة كل واحد ماشي ماسك في إيده شوال احمر كبييييييييييييييييير مليااااااااااان و مجرجر في الأرض ( نفسي اعرف حاطط إيه جوه ) شكله شايل اخوه الصغير فيه . و انا بقى ماسكة شنطة بيضة ( فيها البلارينة الحمرااااا ) .
يا اختي عمرنا ماشوفنا وردة حمرا من حد مفيش حد بيحبنا و لا ايه ؟!!!!!!!!!
ملحوظة رفيعة : البلارينة لسه في الشنطة يعني لسه جديدة و انتوا لالالالالالالالالالالا هه بس كده .
Basketball

من طرف queen of dark الخميس فبراير 18, 2010 6:31 pm

موضوعك حلو ياسلمى بس انتى وجهتى نظرك لحاجه واحده بس للمايصين اللى ف الجامعه بس مش شرط يعنى نقول ع اليوم ده وحش عشانهم وفعلا انا مبحبش اقول كلمه عيد لان ربنا قال عيدين بس نحتفل بيهم
عيد الفطر وعيد الاضحى ..بس الصح واللى بحب اقوله فالنتين دااااااااى valentine`s day

ومش شرط الحبيبه يعنى مااانا ممكن اجيب لصاحبتى هديه .. وابعتلها مسج زى مابتقولى.. واقول للى بحبهم من صحابى ...بس انتى حددتى حاجه واحده بس.

وفى كتير متجوزين بيجيبوا لبعض هدايا يمكن مش كير بس فى ..دول اللى بيحبوا بعض بيقدروا بعض
الزوج اللى عايز يفرح مراته.. الزوجه اللى عايزه تسعد جوزها وتبقا حياتها جنه ودى حاجه مبقتش موجوده ومش شرط ف اليوم ده..

وفى المخطوبين ايه يعنى لما يقول لخطيبته هابى فالنتين ويجيبلها هديه .. اهو يزيد الحب بينهم اللى هيبنوا عش زوجيه مع بعض وهيكملوا حياتهم سوا ...

وسيبك بقا من المايصين اللى زى ( تيتو وميمو ) دول مش شرط نوجه كلامنا عليهم ...

وتـــقــــــبــلــــــــــــــــى مـــــــــــــــــــــــــــرورى

يوم الأرف تاين

يوم الأرف تاين

رد: يوم الأرف تاين

رد: يوم الأرف تاين

رد: يوم الأرف تاين