عادات تقاليد عرف

هذه الكلمات تعوقنا أحيانا فى فعل أشياء حبيين فعلها ومقتنعين بيها
ولكن بسبب ال3 كلمات دول نقول مايصحش
وييجى سؤال ليه ؟؟
ويكون الرد هو كده طلعنا وجدنا آباءنا وامهاتنا بيقولو كده
هقولكو مثال
( البنت عليها كل شغل البيت ) ده من المعروف
والولد يقولك انا اكنس اغسل الاطباق ليه هو أنا بنت !
أنا أرى ان هذا تخلف لأن أفضل الخلق سيدنا (محمد صلى الله عليه وسلم) كان يساعد
زوجاته فى شغل البيت
وهذا افضل الخلق مش حضرتك
واللى يقولك الحقى دا جوزها بيسعدها فى شغل البيت
دا شكلها ممشياه على العجين ميلخبطوش دا مدلعها دا مش عنده شخصيه
دا هيه اللى ممشياه دا زى الخاتم فى صابعها
والهبل اللى بيتقال مش عرفين ان ده واحد بيطبق شرع ربنا فيها وواخد الرسول قدوه له
والعكس لو الست قائمه بكل شيىء يقولو
ايوه دا راجل فى بيته ................. وغيرها
أنا عارفه أن طبعا كل الولاد هنا هتعارضنى وليكن هناك قله
اتمنى ذلك
بس فى النهايه أحب أوضح رأيى أن كل من الرجل و المرأه له دوره الاساسى الذى
يقوم به فالرجل القوامه والمرأه بتهيأة المناخ المناسب للبيت ليصبح جنه ويساعد
الرجل على التقدم والنجاح وتربيه الاولاد ليكونو قدوه لغيرهم فى فعل الخير وطاعة الله
وهذا لا ينفى تماما عمل المرأه بجانب مسؤليه بيتها فى الاساس
ف وراء كل رجل عظيم امرأه
و وراء كل امرأه عظيمه رجل
والعظمه لله الاحد
انا حبيت أطرح حاجه واحده فقط من القيود اللى مسكانا بأسم العادات والتقاليد
ولكن هناك أشياء اخرى كثير
بس حسيت ان هذا الموضوع هو حيوى اكتر ولامس كل البيوت
مستنيا رأيكم

فعلا يا اسماء عندك حق المفروض انه يبقى فى تعاون بين الرجل والمرأه فى كل حاجه ايد بايد وخصوصا فى امور البيت وده ينتج عنه تربيه سليمه للاولاد
بس احنا بقه شطار اوى فى التمسك بالعادات والتقاليد دى اللى هى التريقه على الراجل لما يساعد زوجته فى الشؤون المنزليه او لما الزوجه تساعد زوجها فى اى حاجه مثلا تشتغل علشان تساعده فى مصاريف البيت وحد يتكلم يقولوا لالالالالا دى عادتنا وتقالدنا
بس المشكله ان احنا بتمسك ببعض العادات والبعض لا واقرب مثال لبس الجامعه سواء للبنات او الولاد واكثر البنات اللى بقه فى قمه القذاره بيخدوا عادات وتقاليد الغرب ويطبقوها عندنا طيب اشمعنه دى مش فيها عادتناوتقالدنا وبالعكس الغرب ملتزمين بعادتهم وتقالدهم
فالمفروض قلنا عادات يبقى فى كله مش عاده وعاده
وربننا يسطر عاللى جااااااااااااى
وهوه فعلا موضوع حيوى ومهم يا اسماء وشكرا لمجهودك
وااااسفه للاطاله

متنسوش يا جماعة ان احنا فى مجتمع شرقى
يعنى البنت هيا المفروض اللى بتعمل كل حاجة فى البيت مش معقول الولد هيطبخ ويمسح ويكنس ويأكل العيال امال هيا لزمتها ايه دا واجبها الاساسى يعنى الولد ملوش دعوة بالكلام دة وان كان بيساعد فى حاجات بسيطة
الام مدرسة اذا اعدتها اعدت شعبا طيب الاعراق
اما بالنسبة للشغل لو عاوزة تشتغل تشتغل بس ميأثرش على بيتها
يعنى البيت الاول وبعدين الشغل "دا اذا الراجل وافق انها تشتغل اصلا"
وبعدين دى عاداتنا وتقاليدنا وعرفنا لو شلنا ال3كلمات دول يبقى فرقنا ايه عن الغرب"ماهو الغرب الراجل بيشتغل فى البيت واكتر من الست كمان"
والمصرين معروفين بالعادات والتقاليد ودى فى رايى حاجة نعتز بها سواء بقى فى فرق بين المرأة والرجل او مفيش
ومش اى حاجة الغرب يعملوها احنا كمان نعملها
وانا بعتقد ان احنا من غير ال3كلمات دول منبقاش مصريين لاء دا احنا منبقاش حاجة خالص
ماهى العادات والتقاليد دى بتعرفنا الصح والغلط
معلش طولت عليكم لانه موضوع جميل جدا ومهم
بشكرك عليه

اشكرك يا اسراء على المداخله
ولكن ليه وقفه مع sun
اولا مش دى العادات والتقاليد اللى نعتز بيها
وكمان دى مش فيها تقليد للغرب
فأعظم الخلق صلى الله عليه وسلم كان يساعد زوجاته
وشكرا على مرورك