(( لا للدموع )) فى مادة مناهج البحث ^___^

يا تالتة اعلام اطمنـــــــــــــــوا خالص انا وبنتين جمعنا اكبر قدر من البنات اللى كتبوا السؤال الاول ( الدراسة التحليلية ) وجينا نطلع للعميد طبعا منعونا كلنا نطلع بس انا والبنتين زمايلى صممنا اننا نطلع كلنا عشان نعرف نجيب حقنا ونعمل شكوى جماعية عشان يبقى صوتنا قوى ومسموع بشكل يجيب نتيجة كويسة فاتصلنا بالعميد من موقعنا ادام البوابة وقالنا طبعا اتفضلوا شرفونى فى المكتب وادونى الامن اللى واقف يسمحلكوا بالدخول

وبالفعل طلعنا كلنا ودخلنا بردو كلنا مكتب العميد وشرحنالوا اللى حصل فى المادة دى

فقالنا تلاتة منكم يمثلوا الدفعة ويتكلموا بأسمكم ويقعدوا يكتبوا مذكرة تشرح اللى حصل فى المادة ونطالب بحقنا فيه بدون كتابة اى اسم من طلاب الدفعة

وكتبنا المذكرة احنا التلاتة بشكل كويس جدا غير مستفذ للدكتور عشان يرأف بحالتنا وناخد درجة السؤال من غير ما يتلكك ويدقق على الكلمة

ولما خلصنا العميد طبعا قراه واعجب جدا بحسن اسلوب وتنسيق وصياغة المذكرة اللى كتبناها وقالنا برافوا يا اعلاميات ^____*

والعميد عمل عدة اتصالات وقال بعد ما انتهى منها .....

قالنا : ماتخافوووووووش واطمنووووا خالص وهتاخدوا درجة السؤال وهنعمل لجنة من اشرافى واساتذة المادة مع المسلمى وهتاخدوا حقكم ( لاننا قولنالوا فى ورقة المذكرة اننا عملنا استفتاء وطلع اكتر من 70% من الدفعة كاتبين الاجابة ( الدراسات التحليلية )

ويــــــــــــــــــــــــــــــــــــــارب اكوووووووووووون قدرت اعمل اللى عليا انا وزميلاتى
وادخلنا السرور على قلوبكم

ركزوا فى المادة اللى جاية لكل الشعب بدون توتر او قلق وربنا معانا كلنا ان شاء الله

واى حد عايز حاجة من العميد يطلع يقوله بدون تردد او خوف

(احنا اعلاميين المستقبل ) ^____^

لكــــــــ ارق وخالص تحياتى ـــــــم

اعذريني فلقد عدلت من عنوان الموضوع لان هذا يعتبر تجاوزا مهما يكن فهذا من يعلمنا ولابد من الاحترام
شكرا ليكي على التوضيح ويا ريت كلامك يكون صح

عنــــــــدك حق ...... انا فعلا كنت داخلة اعدله بس حضرتك سبقتنى

شكـــــــرا لك على التعديل

واعتذر على التجاوز

((وانما الاعمال بالنيات )))

لكـــ جزيل الشكر والاحترام ــــــــ

انا عدلته خالص وشيلت اسم الدكتور

تمام كدا جزاكي الله خيرا
بس اسئلك سؤال لما الدكتور العميد يقوله الطلبة مقدمة التماس وكدا عن المادة والسؤال ده وكدا
يا ترى رد فعله هيكون ايه
هيخضع على طول مع العلم ان الدكتور لم يخطىء بل نحن الكخطؤون ودي الحقيقة
التقصير مننا مهما يكن الوضع او ما الت اليه الظروف وفي الاول والاخر كل حاجة بايد الدكتور والعميد لا يملك اي سلطة عليه لان هذا مجال خصوصية لا يمكن تجاوزها ده وجهة نظري بس اكيد اتمنى ان ده يحصل اكيد
ولو ده حصل ايه الي هيحصل مع الطلبة الي حلت السؤال صح مثلا
هل سوف يتم التعميم والجميع يحصل على الدرجة النهائية في السؤال الاول ويتحول الامر لكي يصبح الفيصل هو السؤال التاني سؤال لازم يفرض نفسه خصوصا مع كاما الاحترام للكلام الي قولتيه
تتصوري ممكن الدكتور يعمل الي بتقوليه اتمنى هذا والله اعلم

عادى اللى جابوا الدراسة الميدانية يكون تمام جدا وياخدوا درجتهم بس لو خدت بالك وعملت استفتاء لعدد كبير من الدفعة هتعرف ان حوالى 70% من الدفعة عاملين الدراسات التحليلة .... وده طبعا بناءا على تأكيده فى اخر محاضرة على سؤال الشيت

ومن جهة تانية الدكتور العميد نفسه شاف السؤال ده وقال ازاى يجيبلكم سؤال زى ده من غير ما يحدد نوع الدراسة اللى هتجابوا عليها وكمل وقال ده اكنه سؤال ماجيستير او دكتوراه مش لطلبة فى الفرقة التالتة

واحنا كتبنا كل حاجة بالتفصيل فى الالتماس وبعدين مش قالنا اننا هناخد الدرجة كاملة هو بس ينجحنا فى المادة وخلاص...... لانه شاف ان السؤال الاول ده اجبارى وعليه نص درجة الامتحان .... فبالتاى عمرهم ما هيخلوا تلت اربع الدفعة تشيل المادة

انسة رغد يا ريت تحاسبي في كلامي انتي مندفعة زيادة عن الازم وده غلط
احب اعرفك ان المنتدى في عدد كبير من الدكاترة بيشوفوه يعني ما ينفعش نتكلم عن حد او نجرح في حد لان ده عيب قوي حتى لو على لسان حد تاني

نقطة تانية احب اعرفك بقى ان الدكتور المسلمي موسوعة متحركة فعلا
ويكفي ان ثنويا له مؤلفات في دار الكتب والنشر يبقى ازاي ما نفهمش منه حتى لو اختلفت وجهات النظر يبقى رئيس قسم الاعلام السابق من افضل اساتذة القسم فهو قيمة قوية جدا داخل قسم الاعلام وشوفي كتبه كلها مسجلة بتاريخ اصدار من دار الكتب والنشر يعني هو صاحب الكتاب وليس ناقلا عن احد في مختلف السنين الدراسية التي يدرس لها المسلمي
ارجو تقبل مروري سيدتي واحذري غضبك واحكميه قليلا
ويارب يا ستي الناس كلها تنجح بمزاج الدكتور برضه دون علاقة للعميد بأي صلة للدكتور المسلمي

طب لو سمحت ياريت تمسح موضوعى

وانا من طبعى مابحبش اجرح حد وعارفة انا بطلع كلامى ازاى عشان كده قولت نو كومنت

وعموما انا متعودة اقابل العمل الحسن بالعكس

متشكــــــــــــــرة اوى لحسن فهمك لكلامى اوى

انسة رغد بلاش تصنع زعل وانتي بتقولي اعلامي المستقبل فلازم تكوني اهدى من كدا شوية
وبعدين انا فاهم كلامك كويس لكن انا بتكلم على نقطة معينة وهي انك بتعلني عن كلام حصل بينك وبين العميد الكلام ده تقوليه لأي حد من زمايلك لكن مش تنشريه لان الكلام ده ممكن يسبب مشاكل كبيرة بجد مش بهزر يا ريت ما تزعليش مني انا خايف والله انك تشيلي ذنب والله انا حاسس بيكي كويس جدا وقد ايه انتي مضايقة مش انتي لوحدك بل كلنا
وايه بقى كلمة متعودة اقبل العمل الحسن بالعكس
على اساس اني قولتلك امشي من هنا ولا حاجة هههههه عموما اهلا وسهلا بيكي سيدتي في محرابنا بعيدا عن اي زعل او خلاف يا ريت ما تزعليش وانا فاهم كلامك بس زي ما قولتلك كلامك مش يتقال علني كدا
تقبلي مروري انا عارف اني ازعجتك ولكنك صحفية الغد لابد ان تتقبلي ظروف واعصار الظروف مهما كانت اسف تاني مرة ويا ريت الموضوع ما يكنش خلاف للود يفسد

ياشباب إعلام احنا كلنا اخوات ومش ينفع فعلا اننا نختلف لمجرد إختلاف في الآراء لازم كلنا نكون متفقين إن إختلاف الرأي لا يفسد للود قضية وفعلا احنا غلطنا ان احنامش ركزنا عالنقطة دى لأنها مش مجرد نقطة في الكتاب دى عنوان جانبي ظاهر جدا ولو الدكتور وافق علي المذكرة هيكون من حبة ورفقته بينا مش عشان أي حاجة تانية وبجد ان بدعي ربنا ان الدكتور يرفق بحانا كلنا ويقدر قد إية احنا كنا مضغوطين فى الأسبوع الصعب دا وانا لا املك سوى اني أدعى ربنا يوفقنا كلنا وياريت نبطل بكاء على اللبن المسكوب ونبص لقدام للمواد الجاية وربنا يوفق الجميع

انا واثقه فالدكتور ابراهيم على فكره جدا انه هيرأف بينا والاكيد اللى حصل فى سنه اولى للى فاكر تقريبا كان الموقف مشابه
وعلى فكره يا رغده اولا انتى كان همك المصلحه وشكرا ليكى بس انا البنات قالولى اروح بس انا رفضت وقلت بلاش علشان مش تبقى بالعكس والدكتور اكيد هيراعى
وبعدين موضوع اننا خطأنا او قصرنا...انا شايفه انى نفسى عالاقل انا كنت راحه مذاكره وكنت عمله اللى عليه والباقى على ربنا
وربنا يستر

مع احترامى الشديد يا حور فى وجهه نظرك ان الدكتور هايرأف بينا لكنى معترضه معاكى فيها لانه لو كان ناوى على رأفه بينا كان عملها من البدايه
بس فى الاول والاخر ربنا يرحمنا ويسترها علينا السنه دى