رسالة الى صديقي القبطي !!

رساله الى اخويا وصاحبي المسيحي

اخويا المسيحي ببدأ كلامي معاك بالسلام
ازيك يا صاحبي يارب بخير و دايماً تمام
...و اخبار دراعك اللي انجرح ساعة الأعتصام
لما فــــَدتني و صابك بدالي رصاص اللئام

......
انا لسه فاكر و صوتك بيدوي ف ارض الميدان
و يعلى هتافك و تصرخ كفايه ف وش الجبان
و ايدي ف ايدك يدوبك اسيبك ساعة الأذان
اقف انا اصلي و تحميلي ضهري فأحس بأمان

دقايق و ارجع احاوط قداسك و انت بتدعي
يارب بلدنا الحره العفيه م المحنه تعدي
و نسمع رصاص جنود الطاغوت فأشدك و نجري
عليهم و نهتف عشانك يا بلدي بدمانا هنفدي

وكنا بنضحك لما بنسمع نفاق بأسم دين
من شيخ يقول الثوره حرام و كفر مبين
و قسيس بيهتف ابعد يا قبطي عن المسلمين
و اعلام موجه يوصل رساله اننا مجانين

و ِقدرنا يا صاحبي سوا بأتحادنا نهز الطغاه
و نرمي لمصر الغريقه ف همومها طوق النجاه
و دم شهيدنا بياخد بأيدنا لمجد نسيناه
و نشق طريقنا و يكتب تاريخنا بداية حياه

لكن اللي خان معنى الكرامه و باع البلاد
بيحاول يحرك ديوله الخبيثه تشيع الفساد
و يهيج مشاعر اهالي بسيطه مالكها العناد
و ينشرها فتنه من المدسوسين بأسم الجهاد

لكن انت عارف و انا برضوا عارف
برغم اللي حاصل و رغم المخاوف
تاريخنا و قدرنا و ربنا صارف
نفضل ف وحده ولا يوم نخالف

و حقك يا صاحبي هيرجع هيرجع
ولا حد فينا لصلاتك هيمنع
دا سُــنـة محمد عشان فينا يشفع
بتؤمر ولازم نطيعها و نسمع

و عمر الخليفه قال من زمان
القبطي ف بلده يحس بأمان
اسلامنا سماحه و عدل و ايمان
ولا يوم هيظلم ولا عمره كان

رساله الى صديقي القبطي
منقول

شكرا جدا على الموضوع وربنا ينتقم من المخربين

بجد حلوه اوى
ربنا يحفظلنا مصر والمصريين
شكرا عالموضوع

شكرا على الموضوع يابوب
اللهم احفظ مصر من الحرب والفتنه الاهليه

جزاك الله خيرا على نقلك لهذه الرسالة
التى تحرك مشاعرنا اكثر بحب مصر
واكيد كمان اثرت فيك اخ ايهاب

اللهم احفظ مصر امنة مطمئنة واحفظ شبعها الابى
اللهم ابعد الفتن عن مصرنا الغالية

اللهم احفظ مصر من بطش المتعصبين
امين يارب العالمين اللهم احميكي يا مصر
عاشت مصر وعاش اهليها يد واحدة اميييييييين
اهل مصر في رباط الى يوم القيامة ان شاء الله رغم كيد المتعصبين المتخلفين

عاشت مصر جليله ابيه...

موطن لكل من عبد الله....

اهل مصر في رباط الى يوم القيامة ان شاء الله رغم كيد المتعصبين المتخلفين

بالفعل شعب مصر فى رباط الى يوم القيامة رغم كيد المتعصبين المتخلفين الخائنين الذين تظاهروا اما السفارة الامريكية وطالبوا مجلس الامن ان يفرض وصايته على مصر واستنجدوا بـ امريكا واوربا

لا يحق لك ان تتهم اى مصرى انه خائن...

من يطالب برفع الظلم الذى يواجهه طوال 30 عاما...هذا حق له كمواطن حررررررر..

اما المطالبه بالتدخل الاوروبى والامريكى...فهو ليس الا اندفاع من مظلوم فى بلاده استنجد بالدول الاخرى لانه يرى بلاده فى حاله فوضى لن يسمع صوته والا تنفذ مطالبه بسهوله...وان كان قد حدث ذلك فانه ليدق الناقوس ..ناقوس خطر الفتنه...لتتم العداله وياخذ كل ذى حق حقه...ويجازى كل مجرم....ليتم وأد الفتنه للابد...بالقوانين الصارمه...
ليعيش المصريين فى حب حقيقى لا فى شعارات ....


وان كنت الوم الاقباط على هذا الطلب...

بجد كلنا لازم ننزل ميدان التحرير
الجمعه القادمه مليونيه و هتكون بعنوان
الوحده والتطهير
بجد لازم ننزل عشان نشوف ايه اخره الفتنه الطائفيه دى
ومحدش يقولى مش ليها لازمه
طبعا كلنا شوفنا بعد جمعه التطهير والمحاكمه
تم القبض غلى حسنى ومحاكمته

اى ظلما هذا وان كان موجودا فعلا فلايبيح ابدا ماحدث من الشباب الخائن فلو عند هذا الشباب ذرة وطنية لن يفعل ذلك ابدا مهماحدث فـ المسلمين هم الذين عانوا وذاقوا ابشع الوان التعذيب فى الاعتقالات ومع ذلك لم يفعلوا فى اى وقت من الاوقات كما فعل هذا الشباب الخائن الذى يدعى زورا وبهتانا انه مظلوم ومسلوب الحق ومضطهد ليبرر خيانته العظمى لبلده