بعد ما قرأت الكلام ده قررت أقول لا

بصراحة أنا بقالى أكتر من أسبوع عمال أجمع فى المقالات اللى مع وضد التعديلات وأحفظها فى الفافوريت.. وكل يوم كنت بأجل قرايتها لأنى كنت خايف أقرا ومفهمش.. وأنا سمى وموتى إنى ما أفهمش >_< !ـ وكمان كمية اللينكات المرعبة اللى جمعتها بقت بتفكرنى بكمية المذاكرة ال...لى راكنها من أيام المظاهرات.. @_@ ـ المهم.. بما أنى كنت أخدت عهد على نفسى فى الستايتس بتاع إمبارح إن النهاردة يبقى يوم الحسم وتكون فعالياته كما يلى: ـ "مصر قدامى.. مبارك ورايا.. ضميرى فى قلبى.. كباية الشاى فى إيدى.. التعديلات على يمينى.. واللينكات والفيديوهات متنتورة فى كل حتة " وبعد ما كسرت الحاجز النفسى الرهيب وبدأت أقرا فى المقالات واحد واحد لغاية ما خلصتهم وبعدين دخلت عالفيديوهات لغاية ما اليوتيوب هنج.. لقيتنى فهمت! بجد والله!! ^_^ ـ ومن شدة انشكاحى وثقتى ثقة لا يخالطها شك بأنى فهمت كل التفاصيل والخفايا وفقست كل الاشتغالات.. قلت أنوركم معايا #التعديلات: حلوة ولا وحشة؟؟ بغض النظر عن الاختلاف بخصوص المادة 75 وإلزامية المادة 189 بتاعة صياغة الدستور الجديد، فإن الناس اللى بتقول نعم والناس اللى بتقول لا شايفة إن المواد الباقية كلها حلوة وزى الفل (إلغاء الطوارىء، الإشراف القضائى على الانتخابات، ترشيح الرئيس ب 30 ألف صوت فقط، ...) #طب طالما التعديلات حلوة.. ما قشطة نوافق عليها وخلاص؟؟ اللى بيقولو نعم للتعديلات شايفين كده فعلا لكن اللى بيقولو لا للتعديلات شايفين إن المشكلة مش فى اللى اتعدل.. المشكلة فى اللى ما اتعدلش! بيقولو يا سيدى إن التعديلات دى بترجع الحياة لدستور 71 بتاع مبارك اللى الثورة أسقطته أساسا! وإن الدستور ده مدى سلطات فرعونية للرئيس القادم.. ده غير إن التعديلات خلت بقى فيه مواد فى الدستور عكس بعضها!ـ # دستور 71 : مات ولا لساه عايش؟؟ اللى بيقولو نعم للتعديلات بيقولو انه هيكون معطل واللى هيتفعل هيا مواد التعديلات بس.. لكن اللى بيقولو لا للتعديلات بيقولو إن فيه مواد من المعدلة بتنص على الرجوع لمواد للدستور.. يعنى لسه صاحى أهو وبيلعب! وحتى لو فعلا تم تعطيله كاملا فدا مأزق أكبر لأن التعديلات الدستورية لا تغطى الفترة الانتقالية حتى الانتخابات (6 شهور) إزاى بقى هنعيش الست شهور دول بـ 9 مواد مش جايبة سيرة أى حاجة غير السياسة والانتخابات وبس!ـ # طب والدستور الجديد؟؟ الغريب إن اللى بيقولو نعم واللى بيقولو لا التنين موافقين على عمل دستور جديد!ـ لكن اللى بيقولو نعم شايفين إن التعديلات بتقدم أوضح جدول زمنى للدستور الجديد (تشترط التعديلات تكوين اللجنة التأسيسية بعد 6 أشهر من انتخاب مجلس الشعب وعقد أولى جلساته) اللى بيقولو لأ بيقولو إن التعديلات بتلزمنا بإننا نستنى 6 شهور لغاية إجراء انتخابات البرلمان.. وبعدها ب 6 شهور كمان لغاية إنشاء اللجنة التأسيسية.. يعنى سنة كاملة!! ده كله ولسه الدستور ما اتغيرش.. دا يدوب اللجنة بس اللى اتشكلت! يبقى بالذمة مش ننجز أحسن ونبدأ تشكيل الدستور الجديد من دلوقتى!ـ # الاستقرار ولا العار!ـ اللى بيقولو نعم شايفين إن مناقشة دستور جديد كامل هتحتاج لفترة طوييييييييلة والدخول فى صراعات بشأن بعض المواد الجدلية، مما يفتح الباب للفوضى واالثورة المضادة.. اللى بيقولو لا بيقولو كده كده الدستور لما يجى يتغير هيبقى فيه مناقشات والجدل هيحتدم حوالين المواد المعقربة بتاعته، يبقى نتناقش ونتظاهر ونتغابى على بعض فى حماية الجيش.. أحسن ما نتناقش ونتظاهر ونتغابى على بعض فى وجود الشرطة اللى أى حد يقولها بخ.. بقت تبخ على طول!ـ # الجيش.. معانا ولا مع الناس التانيين؟؟ اللى بيقولو نعم خايفين لا الكرسى يحلو فى عين الجيش وحكم العسكر يرجع تانى.. وفى ناس خايفة إن الجيش يبدأ يبلطج عالخلق خصوصا بعد إشاعات مغرضة بإن الجيش بيعتقل ويعذب أى حد شعره طويل! اللى بيقولو لا شايفين إن الجيش عمره ما داسلنا على طرف ورغم إن حسنى نزله عشان يفض المظاهرات وقف جنب مطالبنا المشروعة وأجبر حسنى إنه يتنحى ووعد بتسليم السلطة امبارح قبل النهاردة.. إيه اللى يخلى خير أجناد الأرض يستندلو دلوقتى؟!! #طب ايه موضوع المجلس الرئاسى ده كمان؟؟ ده حل بديل اقترحه الناس اللى بتقول لأ عشان يمسك الحكم فى الفترة النتقالية بدل ما نعذب الجيش معانا لغاية ما نخلص الدستور الجديد.. وبرضه أهو حل للناس إللى شايفة إن الجيش نيته وحشة!ـ اللى بيقولو نعم للتعديلات، رافضين إن المجلس ده يكون معين من الجيش وشايفين إن ده هيبقى مش فيير خالص! اللى بيقولو لا للتعديلات بيقولو إن الجيش مش هيعينها بمزاجه.. ده هيعينها بناء على اختيار وتوصيات جميع الفئات والأحزاب والأطياف اللى فى البلد.. واللى نفسه فى حد يمثله يقول عليه ـ وبعدين سبحان الله! هنختارهم بيمثلونا زى ائتلاف الثورة اللى بقالهم يجى شهر ونص بيتفاوضو مع الجيش وبيوصلو مطالبنا سواء إقالة حكومة شفيق.. أو تجميد عمل أمن الدولة.. أو عودة الدورى ) مش هنغرق يعنى!ـ # مين اللى هيكتب الدستور.. ؟؟ اللى بيقولو نعم شايفين إن لجنة تأسيسية "منتخبة" من مجلس شعب "منتخب" أفضل من لجنة "معينة" من الجيش اللى بيقولو لا رافضين إن اللى يكتب دستور بلدنا تبقى لجنة من مجلس شعب نصه عمال وفلاحين لا يشترط غير حصولهم إلا على محو أمية! وبعدين فيه نقطة خطيرة ومهمة جدا.. إن آلية انتخاب البرلمان تقوم على التمثيل السياسى المتوازن (السياسى بس!) لكن اللجنة التأسيسية اللى هتكتب الدستور لازم تقوم على التوازن فى التمثيل السياسى والاجتماعى والفكرى والدينى وتبقى ممثلة لكل الأفكار والاتجاهات.. عشان محدش يبلطج على حد!ـ #البرلمان: وطنى وإخوان؟؟ اللى بيقولو نعم للتعديلات بيقولو إن قوة التصويت فى انتخابات مجلس الشعب أيام مبارك كانت 27%، لكن دلوقتى ال 73% الباقيين هينزلو عشان يصوتو، وأكيد مش نازلين ينتخبو الوطنى وإلا كانو انتخبوه من زمان، ومش نازلين ينتخبو الاخوان وإلا كانو سندوهم قصاد الوطنى السنين اللى فاتت دى كلها!ـ اللى بيقولو لأ شايفين إن المشكلة إن مفيش بديل تانى قدامهم للوطنى والإخوان غير أحزاب المعارضة الكوميدية وشباب الثورة اللى نزلو ينضفو الشوارع بعد الثورة وماكانوش مديين خوانة يا عينى فملحقوش يعملو أى أحزاب!ـ وكمان شايفين إن تأجيل انتخابات البرلمان لا هيسحب السجادة من تحت الإخوان.. ولا هيدى الفرصة للبرادعى والشباب الفرافير بتوعه.. ده هيدى للشعب الفرصة إنه يلحق يستوعب كل التغييرات اللى بتحصل ويلحق يلم حرامية الحزب ويكون حكم موضوعى على شباب الثورة لما يدخلو العمل السياسى.. لأنه بقالو 30 سنة بيحكم عالوطنى والاخوان، ومستكترين كام شهر على شباب الثورة اللى زى الورد إن الناس تعرفه وتحكم عليه فيهم! ـ لذلك وللأسباب السالف ذكرها.. قررت .. بكامل إرادتى ومحكوما بضميرى وحبى لبلدى أن أصوت ب (لا) واللى فيه الخير يقدمو ربنا ^_^ ***************** *ملحوظة: الاستفتاء ده مش ماتش كورة عشان نقعد تفكر مين االى هيكسب ومين اللى هيخسر.. ويا ترى الفريق اللى بشجعه هو اللى هيفوز؟؟ الاستفتاء ده على مستقبل بلدنا.. ولأول مرة احنا اللى بنختاره.. عشان كده سواء هنقول "نعم" أو هنقول "لا" لازم يكون فى نيتنا إن فى النهاية مصر هى اللى تكسب! ـ

طيب مااللى بيقولو لأ عشان عاوزين دستور جديد
واللى بيقولو نعم حلوها وقالو هيتشكل دستور جديد بس بمزاج
طيب اللى بيقولو لا وعاوزين يتشكل دستور جديد ...مين اللى يشكله؟؟؟؟
مين يمثلنى ؟؟مين انا موافق عليه؟؟!!
اللى بيقولو نعم قالوا مجلس الشعب اللى الشعب هيوافق عليبيه واللى الشعب هينتخبه واللى هيمثل الشعب ملزم بتشكيل دستور جديد
يبقى ليه نورط نفسنا فمصير مجهول
لكن عموما ده (استفتاء) ولكل شخص رايه اللى من وجهة نظره
وراى الاغلبيه يحكم
وهيرضى بيه اللى بيقولوا نعم واللى بيقولوا لا

تقول "نعم" على التعديلات الدستورية ليه ؟

* خايف من البلطجية و عايز أمن و استقرار ؟
...

...

السيطرة على البلطجية من اختصاص وزارة الداخلية , إيه علاقة الداخلية بتغيير الدستور ؟ هي "نعم" حتخلي البلطجية يروحوا ؟

....
* الاقصاد بايظ و البلد بتقع ؟

الاقتصاد من اختصاص وزارة المالية و الصناعة و التجارة . إيه علاقة دول بتغيير الدستور ؟

* مؤقت و حنعمل دستور جديد ؟

و منعملش دستور جديد من دلوقتي على طول ليه ؟

* عشان حياخد وقت طويل ؟
فقهاء الدستور و دكاترة القانون قالوا ان التعديلات دي تاخد كام ساعة , و قالوا ان عمل دستور جديد كامل لا يأخذ أكثر من 7 جلسات , يعني أسبوع , نديهم شهر كمان عشان الاطمئنان , فين الوقت الطويل ده ؟

* في ناس قالوا ياخد سنة و نصف ؟



و ياخد سنة و نصف ليه ؟ هما مش بيألفوه من دماغهم زي الرواية , دول مجرد بينقلوا من دساتير عالمية و قديمة , إيه بقى اللي يستدعي سنة و نصف ؟



* أصلهم عدلوا المواد الضرورية بس ؟



و هو تقليص صلاحيات الرئيس مش ضرورية ؟ أمال الثورة كلها قامت عشان إيه ؟؟

* ما هم حيقلصوها بعد كده في الدستور الجديد ؟

و مقلصوهاش معاهم في التعديل بالمرة ليه ؟ هو مش تعديل بتعديل ؟ اشمعنى دي ؟؟

* ليه نقبل بدستور مترقع فيه مواد متعارضة مع بعض ؟

لا مفيش تعارض ؟ أصل الدستور كله معطل لكن الحزء المعدل بس هو اللي البلد حتمشي به ؟ و بالنسبة للمواد الخاصة بالصحة و التعليم و ما إلى ذلك ؟ معطلة بردو ؟! البلد كلها حتمشي 6 شهور بمواد خاصة بالرئاسة و الحكم و البرلمان فقط ؟؟؟

* ليه أعمل انتخابات برلمانية الأول و الأحزاب لسة ملحقتش تتكون ؟ عشان الإخوان و الوطني بس هما اللي ياخدوا مقاعد ؟؟



* ليه أنتخب رئيس و أخليه يقسم على دستور مترقع ؟ ينفع تروح تشتغل في شركة و تعمل شغل لمديرك و بعدين تبقوا تكتبوا العقد بعدين بقى على مهلكم و على رواقة ؟ تضمن منين إن المدير ده مش حياكل عليك حقك ؟؟



* فتحي سرور كان في لجنة تعديل الدستور ليه ؟

* الحزب الوطني موافق على التعديل ليه ؟

و ماشي يوزع منشورات على الناس عشان يوافقوا ليه ؟

* تفتكر ليه نادي القضاة مش موافق على التعديلات دي ؟ مش ده شغلهم ؟ مع احترامي لكل اللي قال "نعم" بس مش القضاة أدرى بالصح و الغلط في الموضوع ده ؟ ينفع تبقى عيان و كل الدكاترة شايفة انك لازم تعمل عملية , ييجي محامي يقول لك خد الدوا و حتبقى كويس ؟؟

لو جاوبت على كل الأسئلة دي اجابات مقنعة لك قبل ما تكون مقنعة لي , روح يا سيدي قول "نعم" بضمير مستريح

أشكرك يا بسبوسة

لقد قضى الامر الذى فيه تستفيان
ما اسعدنى حقا ان الكل شارك وادلى بصوته واريد ان اعلق على بعض النقاط
النقطة الاولى هى ليه الاخوان والحزب الوطنى هموا اللى وافقوا على التعديلات دى ؟
ازاى نحط الجانى والمجنى عليه فى بوتقة واحدة وبعدين كان هناك توجه امريكى وتوجه اسرائيلى برفض هذه التعديلات يبقى كده اللى بيقول لا مع اسرائيل و امريكا ضد استقرار مصر

لو تم قبول هذه التعديلات ستاتى بالاخوان وفلول الحزب الوطنى؟
هوة مش انتهى عصر التزوير يعنى اللى هيجى يبقى هوة اللى بيمثل الشعب وهوة اللى اختاره شعب يجى بقى حزب وطنى او اخوان المهم انه جاى بارادة الشعب وبعدين انا شايف انه لم يعد هناك شىء اسمه حزب وطنى

ليه أعمل انتخابات برلمانية الأول و الأحزاب لسة ملحقتش تتكون ؟
طيب ازاى الاحزاب دى شاركت فى الانتخابات السابقة والحقيقة ان هذه الاحزاب ليست لها شعبية وكانت تاتى بالتزوير فكان هناك صفقات بينها وبين الحزب الحاكم لتزوير ارادة الشعب فهى تريد مزيد من الوقت لكى تكون لها شعبية على حساب مصحلة مصر

فى النهاية ذهب الجميع وادلى بصوته سواء كان بنعم او لا وكما قلت سابقا انا واثق ان الاغلبية ستكون نعم باذن الله تعالى

ان كان صباعك مش بمبى ..... متجيش تقف جنبى

تعليق طريف عجبنى
مين لسة قاعد يا جماعة منزلش الاستفتاء صوتك امانة اوعى تفرط فيه مهما كان اختيارك
ومتسيبش حد تعرفه لسة منزلش الا اما ينزل
...يلا شارك فى صناعة مستقبل بلدك