عرض مغرى الى كل حرامى

سريرك عندنا
عرض مغري لكل حرامي , ومش بس كده ده لكل مجرم قاتل نصاب مزور بلطجي
ومش بس كده ,, عايز يسيب وظيفة الحرامي ويمسك وظيفة رئيس جمهورية
تعالى نعملك دعاية انتخابية ونرشحك رئيس لمصر العربية بشرط تشتري سريرنا الطبي
العرض يتيح لك إمكانية سرقة الشعب والقبض عليه في أنصاص الليالي وتعذيبه حتى الموت وسجنه واعتقاله
ويتيح لك العرض إمكانية سرقة أراضي الدولة وبيعها للصهاينة
ومش
بس كده ,, انت مش حتبيع الأرض بس ,, ده احنا حنخليك كمان تبيع اللي تحت
الأرض ,, غاز طبيعي يكفي العالم كله ,, حتصدره للصهاينة وتاخد سبوبة حلوة
تظيط بيها انت ومراتك وعيالك
ومش بس كده ,, حنجيبلك عبارات خربانة
وطيارات هلكانة تطير وتقع بركابها وتغوص بيهم في قلب أحلاها محيط "" وسمك
القرش بقى والحيتان مش حاقولك ,, حتدعيلك ""
وبرضو مش حننساك بكام مليون
ومش بس كده ,, إيه زهقت من العروض ؟ معلش اتحمل ,, دي حاجات مش حتلاقيها في أي مكان في الكوكب اللي انت عايش عليه ده

حنعملك
قنوات فضائية ونخلي المذيعين تطبل والمذيعات ترقص ليل نهار على جمالك
وحلاوتك وطعامتك وإنجازاتك اللي مفيش منها اتنين في الدنيا
واللي حيجيب سيرتك حنقطع لسانه هو ومراته وعياله
واللي حيقول لك " بخ " حنبخره من سجل المخلوقات
حنمصلك
دم الشعب ونمد إدينا في جيوبه وناخد تعبه وشقاه ونغرقهولك أمراض وسرطانات
وفقر عشان محدش يفوق يبص حواليه وياخد باله من جرايمك

حننشرلك بلطجية بالآلاف في كل مكان يوم ما حد ينطق عليك كلمة أو يحب يزيحك من طريقه يشرحوه

وكووووووووول ده كله على بعضه حنطلعك منه زي الشعرة من العجينة
يوم
ما الشعب يفوق لنفسه ويقولك بتعمل كده ليه يا زعيمنا ويطلع شوية مرتزقة
يحبوا يحاكموك على جرايمك دي ,, اشتري السرير بتاعنا وادخل المحكمة عليه

وابقى قابلني لو شافوك على سريرنا وماعيطوش
سريرنا بيحرك المشاعر ويقطع العواطف ويزلزل الزلازيل
سريرنا يخلي الطوبة تنطق وتقول سامحنا يا ريس
سريرنا يخلي العيل يطلع من بطن امه يبوس رجلك عشان تحمكه
سريرنا يخلي شعبك يركع تحت رجليك ويقول والله ما حنعمل كده تاني يا ريس
سريرنا يخلي الفيسبوك اللي خلعك يطلع فيه ناس تقول حرام عليكم ارحموه ده راجل كبير ومريض

شفت ازاي سريرنا مفيش زيه؟
يلا بقى مين عايز السرير بتاعنا , إلحقوا قبل نفاذ الكمية لأن الطلب زاد عليه من الدول العربية بعد ما طلع على الهوا في المحكمة