عجبنى فيكى لون عنيكى

عجبنى فيكى لون عنيكى
ده عبارة عن مسلسل او قصة واقعية تحدث للكثير منا
لكن بطله هذا المسلسل فتاه اسمها ((فاطمة))
يلا نتابع مع بعض حكاية فاطمة
اتمنى اننا نستفاد من القصة وناخد منها العظة والعبرة

من طرف LOVE ANGLE الثلاثاء فبراير 22, 2011 7:52 pm

اوك يا زهره وانا في انتظار القصه

بسم الله الرحمن الرحيم

السلام عليكم ورحمة الله وبركاته

الآن مع الحلقة الاولي

و

الأول تعريف بفاطمة واسرتها
هي اخت محترمة اتربت في بيت محترم مبني ع الاصول والقيم وعارفة الصح من الغلط والحرام والحلال , زي معظم بيوت المسلمين .

فهذه اول سنة لها في عالم الجامعة بعد عالم الثانوية العامة
عالم الجامعة المليء بالمغامرات
والعلاقات
والاختلاط
والموضة
والاغاني
والمخيمات او " الاُسَر" التي تضم شباب × بنات × رقص × اغاني × الدي جي تحت مظلة هذه الاسر المنتشرة في جميع انحاء الكلية _ تيجي تسألهم بتعملوا ايه ف الاسرة دي غير الرقص ؟ يردوا عليك بصرامة لا يا فندم احنا هنا بنخدم الطالب _ اه فعلا ونعم الخدمة ! بيخدموه عشان يسقطوه دنيا وآخرة ولا حول ولا قوة إلا بالله _ .

فتبدأ فاطمة تجهيز نفسها للذهاب الي الكلية بعد مُضي اسبوع منها _ ودا طبعا غلط لانك لازم تحضر المحاضرات الاولي لانها بتبقي مهمة جداااااااا وبتعرفك الدنيا فيها ايه _
المهم وصلت الجامعة وزُهلت من المناظر واللبس والاختلاط والاغاني والضحك ووووووو الضياع .

ففاطمة انكرت دا واضايقت جداا من المناظر دي وذهبت بسرعة ع المدرج ولقت نفس الكلام وبشكل مُركّز اكتر اختلاط رهيب وكله قاعد جمب بعض والدنيا خلطبيطة ولا حول ولا قوة إلا بالله
وكل الأماكن كومبليت ففاطمة ملقتش مكان فاضي غير جمب شلة شباب ,
فطبعا هم الذوق كله مع البنات _ بالذات البنات الجديدة_ قعدوها جمبهم ووسع يا عم للاخت .
المحاضرة بدئت وهي طبعا مش فاهمة حاجة عشان اول محاضرة ليها فبعد انتهاء المحاضرة طلبت من بنت قدامها كشكول محاضراتها عشان تنقلها فالبنت اعتذرت لانها ماشية , فالاخ قاعد وسامع الحوار فطبعا الذوق كله لازم يقدم المساعدة _ دي كمان طلعت محتاجة مساعدة قشطة جدا , دا كلام الولد في سره او مع زمايله _

الاخ الذوق : اتفضلي كشكولي اهو تحت امرك ولو حابة اشرحلك اي درس انا في الخدمة ,
هي كانت رافضة في الاول ولكن الاخ البطل الحّ عليها وخدته وسابه معاها ومشي
_ عشان يضمن انها لازم تستناه عشان تديهوله _ .

ففاطمة احترمته مهي لسه خام مكلمتش قبل كدة شباب خالص في حياتها ودا ناتج عن عدم وعيها , ومحدش قالها علي مكائد الشباب ومكرهم .

وهنا فاطمة اخطأت خطئين مدمرين :
1- قعدت جمب الشباب , كان اكرملها ان تجلس علي سلم المدرج كما يفعل البعض عند الزحام انما تجلس جمب الشباب
لالالالا والف لالالالالالا .

2- اخدت منه الكشكول , يعني يا اخت فاطمة المدرج مفهوش اخوات غير الاخت اللي طلبتي منها ورفضت ؟؟_

المهم نقلت المحاضرات , وفضلت قاعدة مستنياه لحد ما جه واديته كشكوله ,
وقالها ما شاء الله علي خطك رااااااائع ممكن بعد اذنك ابقي انقل منك المحاضرات ؟ ,
قالتله منتا بتكتبها اهو ملهاش لازمة تنقلها مني .
قالها معلش بس الخط بيفرق برده ,
قالتله ربنا يسهل وقامت ماشية .
و

وانتهي اليوم الاول لفاطمة في الجامعة ببعض الاخطاء والتخلي عن مبادئها ودا للاسف نهايته ندم وحسرة وتعاسة ولا حول ولا قوة إلا بالله

فترجع البيت تستشير ماما عن اللي هي عملته _ علي ان ماما هي القدوة _ :
فاطمة : ماما هو انا لو قعدت جمب الشباب غلط ؟ اصلي مكنتش لاقية اي مكان خالص , فلاقتهم هم وسعولي وكمان نقلت منهم المحاضرات ؟
ماما : طالما مكنتيش لاقية مكان خلاص يعني هم الشباب هيكلوكي ؟ وبعدين كويس انك نقلتي منهم المحاضرات اصلهم بيبقوا جدعان وبيحبوا يخدموا إنما البنات دول سِوَس ولُؤَمة .
فاطمة: اه صح يا ماما دانا طلبت من البنت واعتذرت .
ماما : اه شوفتي بقي ! لا انقلي من الصبيان الجدعان واسأليهم عن اي شيء مش فاهماه .

_ للاسف دا رد معظم الاُمهات واستهانتها بكل الامور وعواقبها ,
واقول لكِ يا كل ام فاضلة حافظي علي بنتك اوي احنا في زمن بشع وحرّصي عليها من ذئاب البشر ومتقوليش دانا واثقة في بنتي دي متربية ع الاخلاق , لالالالا طالما فتحتي لها باب النار _وهو الشباب والاختلاط+ اللبس الغير اسلامي + الاغاني + عدم مراقبتها بطريقة غير مباشرة _ يبقي للاسف هتتحرق بالنار دي وانتي هتكوني من ضمن الاسباب ,
هل هذا يُرضيكي لإبنتك يا اُمنا الكريمة ؟؟ _

ونحن فى الانتظار

من طرف LOVE ANGLE الثلاثاء فبراير 22, 2011 8:08 pm

من الواضح انها جميله .......في انتظار المزيد

من طرف elhour الثلاثاء فبراير 22, 2011 10:13 pm

رااااااااااااائع يا زهره
جزاكى الله خير

من طرف mohagaba الأربعاء فبراير 23, 2011 12:32 am

جامده جدا.................بس بجد سمعت عن ولاد محترمين وجدعان بجد وخدموا بنات باخلاص وباحترام وكمان بدلو شرايط عمرو خالد مع بعض ...واول ما فهموا ان السلام حرام بطلو يسلمو على بعض......................بس على فكره" الولد بيبقى محترم على القدر الذى يجد فيه البنت محترمه"....................ربنا يهدى كل البنات والولاد..........."وياريت يرجعو زى زمان ....عصر الشهامه والجدعنه اللى موجوده فى المصريين"

القصة شكلها حلوه من اولها
جزاكى الله كل خير
ننتظر المزيد

من طرف زهرة الاسلام الخميس فبراير 24, 2011 9:31 pm

شكرا للجميع على المرور
وجزانا الله واياكم خيرا

..............................
مرحباً بكم من جديد مع

اختكم فاطمة

والحلقة الثانية من :

تذهب فاطمة الجامعة لليوم الثاني

وناوية انها تحاول تتعرف ع بنات جديدة وتكون صحبة حلوة وشلة بس وصلت متأخرة برده

_ودا غلط قلنا يا فاطمة لازم تيجي بدري احتراماً للمواعيد وعشان تلاقي مكان تقعدي فيه بدل ما تتزنقي جمب الشباب زي امبارح _

وللأسف ملقتش مكان طبعا

فمين لمحها وهي داخلة ؟!

الاخ الشهم بتاع الكشكول

فمصدق انها مش لاقية مكان فراح بسرعة نادلها

وقالها انا جمبي مكان اتفضلي ,

قالتله : لا شكرا

قالها : انتي ممكن تقعدي المحاضرة الاولي بس وبعدين تدوري ع مكان تاني عشان الدكتور هيدخل .

فكرت شوية كدة وبرده قعدت جمبه
_ برخصة كلام ماما _

المهم حضرت المحاضرة الاولي

وقامت علطول

حاولت تقعد جمب بنات
وقعدت بالفعل
ولكنها لاحظت حد بيراقبها مين ؟

_طبعا الشاب الشهم _,
وهي ايضا بدئت تراقبه من بعيد , ولكنها تحاول إفاقة نفسها ولمحاضراتها اول باول ,ولا تُلقي له بالاً .

فدردشت شوية مع البنات وتعرفت عليهن معرفة سطحية كدة وقالتلهم ياريت تحجزولي جمبكم لو اتأخرت بكرة إن شاء الله واديتهم رقم موبايلها وهي بتديهم رقم موبايلها ايه اللي حصل ومين كان سامع الحوار ؟؟

طبعا الاخ الشهم

كان قاعد ورا بس قاعد بظهره عشان هي متشفهوش وسمع الرقم وسجله عنده .

وجاء ثالث يوم وحاولت انها تيجي بدري عشان تلحق مكان كويس ويكون جمب صحباتها ,

فدخلت المدرج وراحت للبنات لاقتهم مش حجزولها جمبهم رغم انها وصتهم امبارح والوقت لسه بدري يعني مفيش زحمة ,

فزعلت فاطمة منهم وراحت دورت ع مكان لوحدها , وقعدت لوحدها ,

فمين وصل المدرج ؟
عمو الشهم

فبص كدة لقي الاخت فاطمة قاعدة وجمبها كمان مكان فاضي _ يعني قشطة جداااااااا _

ودار الحوار الآتي :

الشاب: ازيك ؟ عاملة ايه

فاطمة: كويسة الحمد لله
الشاب :جيتي بدري اهو
فاطمة : اه
الشاب : في مكان جمبك اقعد ؟

_ مهي لازم تدفع ثمن عزومة امبارح واول امبارح لما قعدها جمبه _

فاطمة في تردد سلبي: اه في .

الشاب :طيب شكرا ,
اخبار المحاضرات ايه ذاكرتيها امبارح ؟

فاطمة مش حابة تتكلم معاه ولكن حرجها اللي هيوديها في داهية منعها من انها تكسفه _ : لا لسه
الشاب: طيب لما تذاكريها واي حاجة وقفت قدامك قوليلي علطول
_ وهو اصلا تلاقيه عايد السنة وفي الطراوة وعامل فيها دكتور بس, لزوم الشغل بقي _
فاطمة: شكرا
الشاب : طيب انا متعرفتش باسمك ؟
فاطمة : اسمي ...... فاطمة
الشاب: الله اسم رائع انا اسمي كذا ...
فاطمة : لا تعليق .
الشاب: هو انتي ساكتة ليه كدة ؟
فاطمة: هقول ايه يعني ؟
الشاب : باين عليكي محترمة اوي متقوليش حاجة خالص اقول انا ,
ساكنة فين بقي ؟ وكنتي مدرسة ايه في الثانوي ؟وبتخدي دروس فين ووووووو
وعمّال يسأل وهي تجاوب
ولا حول ولا قوة إلا بالله

وبدأت تتشد له طبعا وتُعجب به بالفطرة ،

ما هو لازم يحصل جذب بين الجنسين وعلشان كدى ربنا سبحانه حرّم الاختلاط.

وندمت فاطمة انها قعدت تتكلم معاه وتحكي عن نفسها كدة

ولكن شيطانها يرادوها : يا بنتي انتي محترمة معملتيش حاجة غلط وبعدين دا كلام عادي مش حب ولا حاجة , هو انتي تيجي حاجة وسط البنات التانية , دا انتي شيخة يا بنتي ,
استني عليا بس انا هوريكي يا فوفو
_عليك اللعنة يا شيطان وهداكِ الله يا فاطمة _

وروحت البيت سعيدة وزعلانة في نفس الوقت بس السعادة غلبت عليها لانها حست ان حد مهتم بيها بالذات من الجنس الاخر
ويااااا سلاااااااام عمالة تفتكر لما قعّدها جمبه و عمال يراقبها ويقدم مساعدته ليا انا بس وجه يقعد جمبي

وفي ظل السرحان العميق دا ...
ماما تنادي علي حبيبة قصدي علي فاطمة _ الوحشة _
ماما :يا فااااااااااااطمة
ماما : يااااااااااااااا فاطمة
ماما : يا بت فاااااااااطمة
ماما : ماتت دي ولا ايه ؟
فاطمة اخيرا فاقت : ايوة يا ماما
ماما : ايه يا بت انتي مش سامعاني كل دا ؟
فاطمة : انتي ناديتي قبل كدة ؟
ماما : اه يختي ناديت ميت مرة كنتي سرحانة ف ايه إن شاء الله ؟
فاطمة : سرحانة ايه بس يا ماما
ماما : وليه بقيتي تحطي روج وكحل وانتي راحة الكلية ؟
فاطمة : فين دا يا ماما دانا كنت حاطاهم من بالليل ودا اثرهم بس .
ماما : ماشي انا هعمل نفسي مصدقاكي بس بلاش الحاجات دي خالص ولا انتي عايزة تتعاكسي ؟
فاطمة ومش عاجبها الكلام : حاضر يا ماما

وفي اليوم الثاني

الاخ جاي بدري وحاجز للاخت فاطمة جمبه ومترقب باب المدرج اول ما تدخل يصطادها قصدي ينادي عليها و دخلت الفريسة قصدي فاطمة وبالفعل وقعت في المصيدة قصدي وافقت انها تقعد جمبه ولا حول ولا قوة إلا بالله ,

الشاب : اخبارك ايه النهاردة يا فاطمة ؟
فاطمة : كويسة الحمد لله .
الشاب : ايه رأيك حجزتلك عشان عارف انك بتيجي متأخرة ومش هتلاقي مكان .
فاطمة : شكراً

الشاب : بصي ابقي رنيلي علطول اول ما توصلي عشان اعمل حسابي , اه صحيح رقمك كام ؟
فاطمة : مفيش داعي انا هبقي اجي ع المدرج علطول .
الشاب : انتي مش عايزة تديني رقمك صح؟
فاطمة : اصله ملوش لازمة .
الشاب : طيب براحتك وقام زعل وقام كلم صاحبه .
فاطمة حست انه زعل وعلي نيتها ولا تدري ان هذه خطة جديدة _ هداكِ الله يا فاطمة _

وقامت كلمته وقالته انت زعلت .
ساب صاحبه وفرح ان الخطة نجحت : لا عادي بس حسيت انك مش عايزة تكلميني فسبتك براحتك .
فاطمة : انا بس مش متعودة ادي لحد رقم تليفوني خاصة لو كان ولد .
الشاب : ما شاء الله عليكي احترام عالي جدااا . انا كنت بطلبه منك بس عشان لما المحاضرة تبدأ ارنلك او اتوسطلك عند فراش المدرج
_ عم الجدع بقي _
وعلي فكرة عايز اقولك ان رقمك سهل اوي
فاطمة باستغراب : رقمي سهل !
الشاب:اه سهل حتي مش هو ........01
فاطمة : انت عرفته منين ؟
الشاب : عادي يعني سمعتك وانتي بتديه لصحباتك امبارح .
فاطمة : حاجة غريبة اوي
الشاب : لو مضايقة اوي كدة همسحه متزعليش دا مكنش رقم يعني !!
فاطمة : .........

والمحاضرات كلها حضرتها معاه

وتروّح فاطمة

البيت
" الاخت الولهانة "

مش " التقية النقية " زمان .
وتدخل اوضتها وتقفل عليها الباب وتسمع الاغنية اللي حضرته بعتهلها بالبلوتوث "

وبعدين لقت التليفون يرررررن :
بتبص لقت :
عم الشهم يتصل بك ...
قلبها دددددق جااااااااامد ,
ارد ولا لأ ..ارد ولا لأ .
لحد ما فصل ومردتش عليه
وعملته صامت .

راحت الجامعة واشترت علبة ميكب " مكياج " زي باقي البنات اشمعنا انا ,
ودخلت المدرج بتدور عليه طبعا وهو عارف انها هدور عليه
قام بصلها بصة عتاب ومورهاش وشه تاني
_ خطة عقاب لها عشان تحرم متردش عليا _
وعمالة تدور عليه في كل المدرج مفيييييش
وتروح الكافتريا مفيييييييييش

كان ناقص تجيب ميكروفون
واحد تايه يا ولاد الحلال محدش شافه ؟؟
وبعدين تتجرأ وتتصل به
لا وكمان بيكنسل عليها

وتروّح البيت مضايقة خااااااالص ولا حضرت محاضرات ولا صلت الظهر والعصر وقضت اليوم في البحث عن المفقود

ولا حول ولا قوة إلا بالله .

ونكمل في الحلقة القادمة إن شاء الله

ونشوف فاطمة هتعمل ايه ؟

من طرف LOVE ANGLE الخميس فبراير 24, 2011 11:36 pm

عجباني اوي القصه يا زهره تسلم ايدك وياريت تنزلي الحلقات باستمرار يعني كل يوم ومش تفوتي يوم بليز بجد
بجد تسلم ايدك يا قمر

من طرف السيد اسماعيل الجمعة فبراير 25, 2011 1:28 pm

هايل

من طرف elhour الجمعة فبراير 25, 2011 2:53 pm

حلو اوى يا زهره
بس فاطمه دى شكلها هبله
وللاسف فى منها كتيييييير
...............
منتظرينك

من طرف زهرة الاسلام الجمعة فبراير 25, 2011 10:06 pm

شكرا على المرور الرائع
..................................

اهلا بكم من جديد والحلقة الثالثة
مع اختكم فاطمة

فاطمة اللي بدئت تتخلي عن مبادئها وتنزل سلم الانحدار شيئاً فشيئاً
فاطمة اللي كانت محترمة جدااا ومتربية في بيت محترم ملتزم إلي حد ما
فاطمة اللي اسمها علي اسم فاطمة الزهراء رضي الله عنها بنت النبي صلي الله عليه وسلم
اين انتِ من اسمك يا فاطمة ؟؟
.................

هيا بنا نُكمل مع فاطمة

و

وكنا توقفنا عند " البحث عن المفقود "
وشربت فاطمة المقلب شرباً بارتواااااااء ,
تعالوا نشوف ازاي
صلوا علي النبي
عليه الصلاة والسلام

توصل فاطمة البيت متسلمش ع حد خالص ولا ع ماما حبيبتها وتقفل الباب ع نفسها
وزعلااااااااانة
ومكتئبة
وسرحانة
وتكلم نفسها : ياريتني كنت رديت عليه ياريتني ..
وماما تنادي عليها عشان تيجي تحضّر معاها الأكل وفاطمة ولا هي هنا في عالم تاني خالص " عالم المفقود "

ماما : بت يا فاطمة مكنتيش بتردي عليا ليه ؟
فاطمة باسلوب جاف جداا: مسمعتش
ماما : ليه دانا الجيران كانت سامعة صوتي وانا بنادي ....
فاطمة : مسمعتش بقي يا ماما اوففففف
ماما : طيب اتكلمي كويس وتعالي كُلي يلا الأكل اتحط وانتي ولا ليكي لازمة .
فاطمة : لا مش عايزة آكل مليش نفس .
ماما : ليه إن شاء الله ؟ انا مش عارفة البت دي مالها مبقاش حد عارف يكلمها ؟
فاطمة : مش عايزة أكل بقي هو غصب ولا ااااااايه اوفففف؟
بابا_كوجه جديد معنا _ : ايه يا بت بتكلمي امك كدة ليه انتي اتجننتي ؟
فاطمة : يا بابا مش عايزة أكل مليش نفس .
بابا : خلاص يلا روحي مع السلامة .

وتدخل اوضتها وهاتك يا عياط

اول مرة تكلمي ماما وبابا بالاسلوب دا يا فاطمة ؟
بتزعئي في وش ماما ؟
ماما حبيبتك ! اللي عمرك مرفعتي صوتك عليها وقليتي ادبك عليها !!
وكمان عشان عايزاكي تيجي تكلي ؟
حرام عليكي يا فاطمة ..
حرام ..

{وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَاناً إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلاَهُمَا فَلاَ تَقُل لَّهُمَا أُفٍّ وَلاَ تَنْهَرْهُمَا وَقُل لَّهُمَا قَوْلاً كَرِيماً }الإسراء23

وقالت انا مش هروح الجامعة بكرة وخدت اليوم كله نووووووووووم وضيعت الصلوات ولا حتي صالحت ماما وبابا اللي زعلتهم ,

فصحيت من النوم ع معاد الكلية اليوم التاني
فتبص في الموبايل لقت 15 مسد كول و5 رسائل
من ميــن ؟؟
طبعا من الشاب إياه
والرسائل كلها اعتذار
وانا اسف
وانتي فين ؟
مجتيش ليه النهاردة ؟
انا قعدت مستنيكي طول اليوم ؟
ياريت تيجي بكرة انا هحجزلك في نفس المكان .
وارتسمت البسمة علي وجه فاطمة
وقامت ولبست اشيك اللبس
والطرحة بدئت تقصر عشان الطقم يبقي اشيك ,
وعلبة الميكب في الشنطة مش هتحط في البيت عشان مش عايزة وجع دماغ من ماما .
وراحت الكلية
وقابلته
واتعاتبوا
وبعدين صافي يا لبن .حليب يا ضياع
ومفيش حضور محاضرات
ولا صلوات
وبقت تسمع اغاني
وبقت تحط مكياج
وبقت تقصر الطرحة
واللبس بدء يبقي ضيق
والكذب علي ماما وبابا وع نفسها .
وووووووو

وطبعا رسائل ورنات طول النهار ولكن نوع الرسائل الأولي كانت دينية .... وبالتدريج .... بقت رسائل .... ولا حول ولا قوة إلا بالله ,

وبعدها خد ايميلها وشاتنج :

وبدئت علاقتهم تتوسع شيئاً فشيئاً, لدرجة ان واحدة من صاحبتها اللي كانت قعدت معاهم قالتلها وهي جاية لوحدها :
البنت : ايه دا يا فاطمة امال فين ........؟ وضحكت هي وباقي الشلة .
فاطمة وطبعا مضايقة من الكلام والطريقة: معرفش هو فين !!
البنت : والله ؟ متعرفيش ! ههههههه وهات يا ضحك
قامت فاطمة سايباهم وماشية

( ودي كانت اول رسالة لفاطمة من ربنا )
فهل فقتي يا فاطمة ؟

وافتكرت فاطمة
مبادئها اللي اتخلت عنها

وان كدة حرام فتلتزم تاني

ومتكلموش

ويرجع يحايلها تاني
وترجع تكلمه وتضعف تاني
وتحس بالذنب تاني
وتقول انا لازم اقطع علاقتي به

ولكن أنّا ذلك وهي سايبة نفسها ف هذا المستنقع

* فاطمة حاليا مقصرة جدااااااا في مذاكرتها بتروح الجامعة عشان تقعد مع الشاب دا
* فاطمة مقصرة جدااااااااا عائليا

*وطبعا مقصرة جدااااااااا روحانيا مع الله

واحسااااااس بالذنب رهييييييييييب
ووحدة
وانعزال
وضيق
وبقت قافلة ع نفسها الباب علطول

ويدخل عليها اخوها الصغير
ويقولها فطوم انتي فين ؟ بقالك كتير مسمعتليش قرءان ؟ مش هتسمعيلي بقي ؟
فاطمة بتسمعه بحسرة وندم وخدته في حضنها وعيطت .
_طيب ليه يا فاطمة معذبة نفسك بمعصية ربنا وانتي اصلا كويسة ليه ؟؟! ,ليه تلوثي نفسك وانتي نقية اصلا ؟؟! _

( اخوها دا كان تاني رسالة من ربنا لفاطمة ...)

فهل فقتي يا فاطمة ؟

وماما تدخل عليها ويبدأ الحوار الآتي بين فاطمة وماما :

ماما : فاطمة فيه ايه ؟ مالك ؟ اتغيرتي ليه يا بنتي ؟ فيكي ايه ؟ قوليلي ! مبقتيش تقعدي معانا خالص ليه؟

_فاكرين حبيبة كانت منشغلة بايه ؟؟ وفاطمة منشغلة بايه ؟؟ هداكِ الله يا فاطمة_

فاطمة في استنكار لواقع حالها مع غرغرة في العين : مفيش يا ماما انتي عارفة الدراسة بقي والانشغال

ماما : الدراسة برده . ؟

ماما : طيب يا حبيبتي انا عارفة انك متفوقة
وربنا يوفقك يا بنتي عايزاكي تفرحينا بقي زي ما

فاطمة : اه يا ماما صدقيني المحاضرات اتراكمت عليا وانا مش متعودة ع كدة .

فرحتينا في الثانوية كدة وتجيبي تقدير عالي .

فاطمة : يارب يا ماما ادعيلي ربنا يهديني ,

ومش هتحكي حاجة تاني لماما لانها في الاول كانت خام
إنما دلوقت اتلوثت بجو الجامعة اللي فتحتله الباب للاسف

مين بيتصل بيها دلوقت ؟؟

الشاب إياه

وهي كانت عاملة الموبايل "صامت" كما اعتادت من بعد ما عرفت الشاب دا
بس نسيت الموبايل في الصالة ودخلت نامت .

"صامت دا علامة ان في شيء غلط
ملحوظة يا اباء ويا امهات لما تلاقي ابنك او بنتك عامل الموبايل صامت او بكود سري للدخول"
خلي بالك اوي ابنك أو بنتك في خطر
دعبس وراه وشوف وراه ايه ؟؟ عشان لو في حاجة ودا اكيد تلحق تلحقها"
فالشاب عمّال يتصل يتصل , فماما عدت من جمب الموبايل ولقته منور فراحت تمسكه تشوف مين بيتصل لقت ايه ؟؟
(اسم الشاب) يتصل بك ...
ماما بتبص واستغربت ايه دا مين الولد دا وبيتصل في نص الليل كمان ؟؟ فلسه جاية ترد لقته خلص اتصال , فحاولت تفتح الموبايل عشان تكلمه وتعرف هو مين !
لقت فاطمة عاملة الموبايل برقم سري محدش يعرف يفتحه !!!
فدخل الشك قلب الأم اخيـــــراً
فاستنت لمّا فاطمة تصحي وصحيت فاطمة عشان تروح الكلية ودار الحوار الآتي :
ماما : انتي تعرفي واحد اسمه .... (وهنا الام مطعلتش فطنة المفروض كانت توقعها الاول ف الكلام ولكن دا حال معظم امهاتنا لما بيتقهروا وبيتصدموا من ولادهم مش بيعرفوا يحكموا الامور كما ينبغي )
فاطمة في خوف ورعب من سؤال ماما واسلوبها بس طلعت ذكية بقي ف ردها " الشيطان بقي ": اممممممممم اه يا ماما دا زميلي اللي انتي قولتلي انقلي منه المحاضرات ف بداية الدراسة .
ماما مع ندمها انها قاتلها كدة : بس متوصلش بيه انه يتصل بيكي الساعة 3 بالليل اتجنن دا ولا ايه ؟
فاطمة : انا هزعئله يا ماما _ يا بت يا حمشة _.
ماما : لا انتي متكلموش تاني خالص , فاهماني يا فاطمة متكلموش تاااااااني , وبالنسبة المحاضرات منتي بتحضري كل حاجة ليه تنقليها من حد ؟؟ ولو اتزنقتي ابقي شوفي واحدة من زميلاتك .
_ كان فين كلامك دا من الاول يا امنا الفاضلة ؟؟ _

فاطمة : حاضر يا ماما .

فاطمة مش عارفة تعمل ايه ف كلام ماما وتعلقها بالشاب دا ومحايلته ليها !!

( وموقف ماما دا كان ثالث رسالة من ربنا لفاطمة )

فهل فقتي يا فاطمة .؟؟

توصل الجامعة وتلاقيه مستنيها ع باب الجامعة ويبدأ الحوار الآتي :

فاطمة : انت بتتصل ليه بيا بالليل كدة وعملتلي مشكلة كبيرة اوي مع ماما وبدئت تشك فيا ؟

الشاب : ايه اللهجة دي يا فاطمة , دا جزائي عشان افتقدتك ؟!
فاطمة : لا بس متتصلش بيا بالليل كدة .
الشاب لما لقاها لسه متنشنة : خلاص انا اسف مش هعمل كدة تاني روّقي بقي ؟
فاطمة : انا عايزة اعرف انت بتكلمني ليه دلوقت وايه سبب علاقتنا دي ؟
الشاب " يا نهار ابيض" دي بينّها هتبقي قاعدة غم النهاردة : عشان انا اتعلقت بيكي وعايز ارتبط بيكي .
فاطمة :ايه اللي يثبت انك عايزني ؟
الشاب : حاجات كتير يا فاطمة في ايه مالك ؟
فاطمة وبتعيط وضعفت تاني : انا مش طايقة نفسي حاسة اني مكروهة من الدنيا كلها .
الشاب + إبليس : ليه يا بنتي فيه ايه ؟ انتي عملتي حاجة غلط لسمح الله ؟ منتي زي باقي البنات ؟ وبعدين بقي اخلاقك دى هى اللى شدتى ليكى وتدينك كمان ؟
ومعاكي حبيبيك اللي بيحبك وف نفس الوقت مبتعمليش حاجة شاذة يعني , انتي مكبرة الموضوع اوي ومأفوراه زيادة عن اللزوم ’ متبقيش خنيقة بقي .
فاطمة والشيطان اثر عليها للاسف : انا مش خنيقة انا عايزة اعرف انا صح ولا غلط
_ جاية تسألي الشيطان يا فاطمة يا ذكية ؟ ما طبعا هيقولك انتي صح ومية مية _
الشاب : انتي زي الفل , ناقصك بس
الضحكة الحلوة
و

ورجعت تاني لنفس الضياع بعد رسائل ربنا الخفيفة لها لعلها تفوووووق ,

ولكنها يظهر من النوع اللي لازم تحصله مصايب عشان يفوق

وإليكي يا فاطمة هذه الأبيات
نفسي تقوليها للشاب دا
اسمعي كدة قصدي... اقري كدة :

إعذرني فأنا إمرأة أخرى

إعذرني فأنا إمرأة أخرى
لا تحبك ولا تهواك
لم تبيت تحلم برؤياك أو لقياك
إمرأة جادة لم تفكر فيك يوما حتى تنساك
إعذرني فأنا إمرأة أخرى
لا تجيد لغة الحب والغرام
إمرأة مختلفة غير نساء هذه الأيام
إمرأة تجيد أشياءًا عديدة
غير الأحلام والهيام
إعذرني فأنا إمرأة أخرى
لا تتكلم بلغة العشاق
الطريق إليها ليس مفروشا بالورود
ولكن بالأشواك
ليس صيدا تصيده أيها الجاهل بالشباك
إعذرني فأنا إمرأة أخرى
إمرأة أبية ليست كالأخريات
لا تهمها إبتسامتك ولا تسحرها أجمل النظرات
لا لن تستجيب لما تقدمه لها من مغريات
فهي ثابتة على قيمها كالجبال الراسيات
إمرأة اخرى
تعرف لخالقها قدره فلا تقع في الموبقات
لم تحلم بالحب يوما الا فيما يقربها للجنات
امراة لا تريد أن تحشر إلا مع الصالحات
لأني
إمرأة أخرى

والي اللقاء مع الحلقة القادمة

ومع رسائل ربنا الجامدة
والمصائب اللي هتتحل ع دماغ فاطمة

عايزين تعرفوا مين الاخت " حبيبة " اللي كل شوية نتكلم عنها ؟ سوف نتكلم عنها فيما بعد فهى مسلمه بحق:

تابعونااااااااااااا

ننتظر

من طرف LOVE ANGLE الجمعة فبراير 25, 2011 10:53 pm

فعلا الحلقات دي تحفه
ربنا يكرمك يا زهره يارب
وتسلم ايدك ياقمر
وانا في انتظار الحلقات المقبله

من طرف هداية الرحمن السبت فبراير 26, 2011 12:03 am

جزاكى الله كل خير
منتظرين المزيد

من طرف زهرة الاسلام السبت فبراير 26, 2011 8:32 pm

مرحباً بكم من جديد مع

اختكم فاطمة

ومع الحلقة الرابعة من :

معادنا مع حلقة المصايب
معادنا مع حلقة البلاوي
معادنا مع حلقة الصعقات اللي نازلة تراخخخخخ علي دماغ فاطمة
معادنا مع الرسائل الربانية اللي تزلزل القلب
اصل ربنا مش بيفضح حد من اول مرة ابداااااااااا
قال تعالى : (( وَلَوْ يُؤَاخِذُ اللهُ النَّاسَ بِمَا كَسَبُوا مَا تَرَكَ عَلَى ظَهْرِهَا مِنْ دَابَّةٍ وَلَكِنْ يُؤَخِّرُهُمْ إِلَى أَجَلٍ مُسَمًّى فَإِذَا جَاءَ أَجَلُهُمْ فَإِنَّ اللهَ كَانَ بِعِبَادِهِ بَصِيرًا))
عن السلف الصالح
سرق أحد الرجال فأخذوه الى عمر بن الخطاب رضي الله عنه ، فقال الرجل : أقسم بالله هذه أول مرة ، فقال عمر : كذبت إن الله لايفضح عباده من أول مره..

اللي يبات نار يصبح رماد
واللي فات مات وانتهي وكأنه لم يكن
واحنا ولاد النهاردة
يعني ايه؟؟
يعني فاطمة بعد الرسائل اللي ربنا بعتهلها قبل كدة بقت رماد ..انتهت كأنها لم تكن .. مرت عليها مرور الكِرام..
وللاسف يا فاطمة طلعتي غبية
عارفة ليه؟
لان في حكمة بتقول :
" الذكية من تتعظ بغيرها .. والغبية من تتعظ بنفسها "
وانتي مصممة تتعظي بنفسك
ومصممة تمشي في طريق الضياع
طيب يا فاطمة خليكي
وتعالوا نشوف ما نهاية هذا الطريق :
ومع اول رسالة ربانية بجد لفاطمة
فهل فُقتي يا فاطمة ؟

طبعا فاطمة دلوقت بقت واحدة تانية خالص في
اللبس - المكياج - الاغاني - طبعا المشي مع الولد دا - الكذب
كانت في الاول بتتكسف تمشي معاه صراحة في بساتين الجامعة المُلغمة ,
ولكن طبعا دلوقت بقت في منتهي الجرأة
واهي ماشية معاه في الجامعة
شايفنها ؟
وماسكة الموبايل
وفاتحة اغاني ترطب الجو
والايد في الايد

فمين تشوفهم ؟
اخت منتقبة ايجابية اشمئزت من المنظر دا وحست ان فاطمة جواها الخير وممكن تتقبل النصيحة
ولكنها محتارة تكلمها ازاي وهي ماشية مع الولد
فتنتهز فرصة ان الولد راح يكلم صاحبه
وفاطمة وافقة لوحدها دلوقت
ودار الحوار الآتي :
الاخت المنتقبة: اختي ممكن اخد من وقتك ثواني ؟
فاطمة باستغراب وقفلت الاغنية اللي كانت شغالة ع الموبايل : ليه خير ؟
الاخت :خير إن شاء الله , ممكن ؟
فاطمة : اتفضلي .
فالاخ شافها واقفة معاها فساب صاحبه وجه جري وقالها تعالي
_لانه عارف انها مش صاحبتها فاكيد عايزة تنصحها بحاجة_
فاطمة : استني لما اخلص مع الاخت .
الاخت : اشكرك ع تلبية طلبي انا مش هعطلك ,
اختي انتي باين عليكي ما شاء الله صالحة ووشك فيه الخير والنقاء
فاطمة : شكرا اختي
الاخت : لكن يا اختي اللي يشوفك ماشية مع الولد ممكن يفتكر عنك غير كدة حبيبتي !
فاطمة باحساس بالذنب : ايه هيقول عني ايه , انا ع فكرة كنت بلبس طُرَح طويلة قبل كدة ومكنتش بسمع اغاني وكنت بحفظ قرءان علطول .
الاخت : ما شاء الله طب وليه يا اختي كنت كنت كنت والواقع دلوقت اتغير وبقيتي العكس
واخطر حاجة دلوقت هو المشي مع الشباب
لان احنا كبنات اهم حاجة هي " سُمعتنا "ومجرد اني امشي مع ولد اياً كانت نيتي كويسة فدا ممكن يشكك الناس فيا ويخلي سمعتي وحشة ,
فاهماني يا اختي .؟
فاطمة فكرت شوية كدة : عندك حق يا اختي وشكراً ع نصيحتك بس انا مش شاذة يعني بصي كدة لكل البنات كدة والمناظر كلها عاملة ازاي ؟ مش انا بس.
الاخت : وانتي لييه تبقي زيهم انتي افضل واحسن منهم ربنا يبارك فيكِ ويهدينا جميعا للعفاف والستر.
فاطمة : لا انا مش افضل منهم انا زييهم وانا لما الاقي الناس دي كلها اتغيرت ابقي اتغير انا .
الاخت : "إن الله لا يغير ما بقومٍ حتي يغيروا ما بأنفسهم" يعني لازم تبدئي انتي بنفسك وتُقبلي ع الله وتحاولي تغيري نفسك بالتدريج , وربنا يحفظك يا اختي , اللهم بلغت اللهم فاشهد
ع العموم دا رقم تليفوني لو حبيتي تقوليلي اي حاجة وتفرحيني .
فاطمة : طيب ادعيلي يا اختي , ونقلت الرقم .

طبعا الاخ علي اخره من الحوار الطويل دا
فترجع فاطمة مضايقة اوووي ومكشرة ومتأثرة بكلام الاخت
فيقولها في ايه قالتك ايه دي ضايقك كدة ؟
وفاطمة لو فيها ريحة الذكاء مكنتش تقوله ع الحوار انما ازاي ؟؟
مصممة ع الغباء
فاطمة : قاتلي كذا وكذا .... وقالته كللللللللللللللل الحوار وحتي قالتله رقم تليفون الاخت .
انتو متخيلين مدي الغباء والاستهتار اللي فاطمة فيه ؟!
الشاب فكر كدة وقال مع نفسه والله عندها حق بنت محترمة مش دي_ علي فاطمة يعني _.
فاطمة : ايه اخرة علاقتنا يا ..
الشاب : انتي اتأثرتي بكلام البنت دي ولا ايه ؟ يا بنتي دي تخاريف بتوع النقاب دول يعني انتي مش عارفاهم ؟! سيبك سيبك ويلا بينا .
فاطمة : ع فين ؟ وبعدين احنا المفروض قربنا ع نهاية الترم والامتحانات قربت جداا وانا معرفش اي حاجة في اي حاجة عايزين نحضر محاضرات بقي .
الشاب + الشيطان : يا شيخة بقي بلا محاضرات بلا وجع دماغ قال يعني هتفهمي حاجة ؟ يلا بينا نقعد في حتة هادية كدة لاحسن الواحد مضايق اوي وتعبان .
فاطمة نسيت طبعا كلام الاخت وموضوع المحاضرات وانشغلت بضيقه وتعبه : ليه مالك ف ايه ؟
الشاب : تعالي بس ونبقي نحكي هناك
فاطمة : هناك؟ هناك فين واجي فين ؟
الشاب : لا متتخضيش كدة اي مكان هادي في الكلية .
فاطمة : ااااه طيب يلا
راحوا مكان هادي جدا وطبعا مين معاهم الشيطان " ابليس عليه لعنة الله "

المهم اثناء اللقاء دا
حب يتعرضلها بشيء من اللمس
فهي صوتت فمين سمعهم ؟
أمن الجامعة
ولاول مرة نجد شهامة الأمن هنا
_ وع فكرة الموقف دا حقيقي اتحكالي بالنص للاسف _

فالأمن جالهم وقالهم انتو ايه اللي جايبكم هنا ؟
ففاطمة مردتش كل اللي بتعمله عياااااااااااااااااااط ..
وهو برده مردش
فرجل الأمن يوجه الكلام لفاطمة : وانتي بتصوتي ليه إن شاء الله مش انتي جاية هنا بنفسك معاه ولا هو اداكي مخدر؟
طبعا هي عيااااااااااااااااااااااااااااااااااااااااااط
الأمن : وانت بتجبها هنا ليه ؟ مترد يله .
الأمن : يعني مش عايزين تردوا طيب كل واحد فيكوا يطلع كارنيهه .
فاطمة وصوتها مش طالع من العياااااااااط : عشان خاطري خلاص مش هعمل كدة تاني هو قالي عايزين نروح مكان هادي في الكلية.
الأمن : مكان هادي ! وانتي هبلة ؟ بتصديقه ؟
فخد كارنيهاتهم وقالهم يلا ورايا انتو الاتنين ع مكتب رئيس الكلية وهو ماشي وهم ماشين وراه
قدام الملأ كله وفاطمة عمالة تعيط
وفضيحتها بقت ع كل لسااااااااااااان في الجامعة

وخرجت من مكتب رئيس الجامعة راسها في الارض وقالت للشاب انا هروّح حالا مع السلامة .
واتفضحت فاطمة في الجامعة كلهااااااااااااااااااااا
وسُمعتها بقت ع كل لسان في الجامعة
فهل هذا الزلزال مفوقكيش يا فاطمة ؟

وتروّح فاطمة وتفتكر الاخت المنتقبة اللي نصحتها وطلع كلامها كله صح .
بعد اللي حصل دا
تقرر ايه بقي فاطمة ؟
طبعا سامعاكوا كلكوا بتقولوا طبعا قررت التوبة ومش هتكلم الولد دا تاني وهتشوف دراستها بقي
صح ؟
انما للاسف مش دا قرارها اللي قررته بعد الزلزال دا
تقوول لنفسها انا مش راحة الجامعة دي تاني لحد الامتحانات
!!!!!!!!!!!!!!!!

دا قرارك يا فاطمة؟؟؟
طيب ليه يا فاطمة القرار دا ؟
فاطمة : عشان انا بس اللي حصلي كدة دوناً عن البنات دي كلها .
دا السبب يا فاطمة؟؟
فاطمة : اه هو دا اشمعنا انا اللي يحصلي كدة ؟
دا بدل متقولي ان انا ربنا بيحبني وبعتلي رسالة عشان افوق وارجعله ؟ وامشي ع الصراط المستقيم مثل ما كنت ؟!
وبدل ما تقولي انا هذاكر في البيت ومش هقابل الشاب دا تاني ابدااااااااااااااااااا وتصلي ركعتين توبة !!!!!!!!!

وفاطمة تدخل البيت وتحط كشكول المحاضرات ع وشها عشان محدش يشوف عينيها المورّمة من كتر العياط
وماما بقي تفتحلها س & ج وطبعا فاطمة مش ناقصة
فتدخل تتسحب بسررررعة وتناااااااااااااااااااام من غير برده ما تصلي اي حاجة .

إن الله لا يفضح عباده من أول مرة ..

ولما فاطمة تصحي من النوم
هنشوفايه اللي هيحصلها تاني ؟
وهل الاسرة الكريمة هتعرف حاجة عن اللي حصل ؟
وهي هتعمل ايه ؟
وهل هتسيب الولد دا ؟

كل دا هنعرفه في الحلقة القادمة إن شاء الله
انتظروووووووووووووووونا

من طرف LOVE ANGLE السبت فبراير 26, 2011 9:05 pm

والله القصه دي تحفه يا زهره
وانتظر المزيد

من طرف elhour السبت فبراير 26, 2011 9:26 pm

تسلم ايديكى يا زهره
بس برده للاسف فى من فاطمه كتير فى جامعاتنا
منتظرينك

من طرف السيد اسماعيل السبت فبراير 26, 2011 10:06 pm

ننتظر

من طرف أمير الاعلام الأحد فبراير 27, 2011 3:34 am

طيب لو واحد حب بنت بجد يعبرلها ازاى وهيا معاه في الجامعة ايه الطريقة المناسبة يا زهرة اللي ممكن يحبها بيها مش كل الشباب صدقيني زي بعضيهم في شباب وحش جدا وفي شباب بيحب عشان الارتباط والله يا زهرة اتمني الرد علي السؤال ؟

من طرف أمير الاعلام الأحد فبراير 27, 2011 3:44 am

انا مستني علي نار موووووووووووووووووووت بجد والله يا زهرة انتي فنانة بجد سؤاء كنتي كاتبة انتي القصة دي او جايباه من اي حاجة بس ياريت بردو تبقي تردي علي سؤالي في ناس شباب بيبقوا طيبين ونيتهم حلوة ولا لاء ده السؤال يا زهرة ؟ونفسي اعرف بجد نهاية القصة دي

من طرف زهرة الاسلام الأحد فبراير 27, 2011 10:30 pm

جزاكم الله خيرا جميعا على المرور
اما بالنسبة لسؤال الاخ امير الاعلام
بعد اذنه هأجل الرد عليه حتى نهاية القصة
وزقنا الله الهداية والتوبة والاخلاص فى القول والعمل

يلا نتابع مع بعض حلقة جديدة من
عجبنى فيكى لون عنيكى

من طرف زهرة الاسلام الأحد فبراير 27, 2011 10:32 pm

مرحباً بكم من جديد مع الحلقة الخامسة من :

ومع اختكم
فاطمة

آآآآآآآآآآه منك يا فاطمة

يا تري يا فاطمة عاملة ايه ؟
حالتك النفسية اخبارها ايه دلوقت بعد فضيحتك في الجامعة ؟
هل راضية عن نفسك ؟
بم تُحدثك نفسُكِ يا فاطمة ؟

تصحي فاطمة من النوم وتكلم نفسها
يارب اشمعنا انا اللي حصلي كدة ؟
ما البنات كلها زيي ويمكن اكتر كمان مني ؟
بس انا ربنا بعتلي رسايل كتير
وانا اللي كنت بضعف قدام الولد دا
خلاااااااص اتفضحت بعد اما ربنا سترها عليا كتييييييييير
يااااااااااااارب
منه لله الولد دا , ازاي يعمل كدة ؟
يبقي هو كان فاكرني بنت مش كويسة وكان بيعلب بيا كل دا ؟؟
ازاااااااي ؟ بعد الحب دا ؟ والمشاعر دي ؟ والأحلام دي ؟
انا مش مصدقة نفسي ,
بس برده انا السبب عشان روحت معاه المكان دا وطبعا كان ثالثنا الشيطان

ربنا يستر ومحدش يعرف من البيت عندي باللي حصل ؟ بس اكيد هم مش هيعرفوا اصل هيعرفوا منين ؟
وانا كمان مش هروح الكلية تاني بحجة اني عايزة اقعد اذاكر بقي قبل الامتحانات ,
اه صح الامتحانات وانا مذاكرتش حاجة خالص وباقي خلاص 3 اسابيع عليها يا نهار ابيض
اممممممممممممممممم
تسمع صوت رسالة واردة من ....

الولد إياه

(( فاطمة انا اسف , مكنش قصدي عشان خاطري سامحيني يا فاطمة, لو مسامحتنيش هنتحر لو مبعتليش رسالة وقولتيلي انك مسامحاني انا بجد هنتحر ومش بهزر ))

فاطمة بتقري الرسالة ومحتارة والشيطان جمبها طبعا ويقولها حرام عليكي الواد هينتحر بسببك , يرضيكي يدخل النار بسببك ؟ مقالك خلاص انه مكنش يقصد , وقالك اسف عايزة ايه تاني ؟ وبعدين ما انتي السبب برده يا فوفو روحتي معاه وهيئتيله الجو , يلا بقي ابعدي الشيطان عنك _ اللي هو انا _ و ابعتيله رسالة السماح ومتبقيش قاسية وقلبك جامد أمال بتحبيه إزاي بقي ؟

طبعا الوسوسة شغالة
ونفسها الأمارة بالسوء شغالة برده
وقلبها اللي اتعلق به جامد برده مظبط الدنيا
هيودوكي علي فين تاني يا فاطمة ؟
اصلي اتعلقت به اوي
مش هقدر ابعد عنه
انا مقدرش تعدي عليا لحظة إلا ولازم افكر فيه
مش عارفة افكر
اعمل ايه ؟
تصلح من وضعها الغلط دا وتقطع علاقتنا بالشاب دا خالص وتفوق لنفسها في كل حاجة ؟! ولا قلبها اللي اتعلق بالشاب جدااا واللي ناوي ينتحر لو مكلمتوش !!!
يارب اعمل ايه ؟؟؟؟؟؟؟؟؟

بتسألي ربنا يا فاطمة !!!!!!
ربنا اللي خلتيه أهون الناظرين إليكي !!
ربنا اللي رسايله ليكي بتبقي أقل اهتمام منك ولا تُلقي لها بالاً !!
ياااااااااااااا يا فاطمة
كل دا ومش عايزة تفوقي ؟
كل دا مصممة علي المعصية ؟
كل دا مش عايزة تختاري ربنا ؟

يااااااااااااااااااااه يا فاطمة

وفي وسط الحيرة اللي هي فيها دي تقلب في الموبايل تلاقي نمرةالاخت اللي كلمتها قبل كدة
فتفتكر طريقة كلامها المُريحة وتفتكر ان ملهاش صحاب خالص وانها دفنت نفسها مع الشاب دا وبعدت عن كل فرصة صداقة فتتردد تكلمها ولا لأ ..
فقالت اما اكلمها لعلي الاقي الحل عندها .
تتصل بيها والاخت ترد :

الاخت : السلام عليكم
فاطمة : وعليكم السلام ازيك يا اختي
الاخت : اهلا مين حضرتك ؟
فاطمة : انا اللي انتي نصحتيني قبل كدة ف الكلية وادتيني تليفونك .
الاخت : اه اهلا وسهلا بيكي اختي الحبيبة والله انا سعيدة جدااااا بيكي انك كلمتيني وافتكرتيني ممكن تعرفيني باسمك ؟
فاطمة : الله يسعدك انا اسمي فاطمة
الاخت : ما شاء الله فاطمة ربنا يجعلنا واياكِ مع فاطمة الزهراء رضي الله عنها .
فاطمة : اللهم امين , كنت عايزاكي يا اختي اتكلم معاكي في حاجة ضروري جدااا .
الاخت : انا تحت امرك يا حبيبيتي تحبي امتي وفين ؟
فاطمة : بلاش الجامعة, اختاري اي مكان غير الجامعة
الاخت : ليه يا حبيبتي دا الجامعة هي ءأمن مكان نتقابل فيه
فاطمة في سرها ءأمن مكان !! دا دا مكان فضيحتي : لا يا اختي مش عايزة الجامعة .
الاخت : طيب يا حبيبتي ممكن تقوليلي نبذة عن الموضوع لحد ما نتفق ع مكان نتقابل فيه .
فاطمة : حاضر الموضوع هو اني ........ وحكيتلها موجز بسيط كدة لحد الرسالة الاخيرة بتاعة الانتحار .
الاخت : لا حول ولا قوة إلا بالله .. طيب يا اختي اول حاجة تعمليها تقومي حالا تصلي ركعتين توبة لله وتبدئي صفحة جديدة مع ربنا .
وثاني حاجة لازم تغيري رقم موبايلك ومترديش ع الشاب دا نهاااااااااائي لحد منتقابل إن شاء الله .
فاطمة :

بس انا متعلقة به بصراحة يا اختي اوي ومقدرش ابعد عنه ابدا .
الاخت : طيب يا فاطمة لحد ما منتقابل بس
ممكن ؟
فاطمة : إن شاء الله هحاول
طيب هنتقابل امتي وفين ؟
الاخت : طيب ايه رايك في المسجد اللي جمب الكلية ؟
فاطمة : جمب الكلية طيب اهو اهون شوية من الكلية نفسها طيب امتي ؟
الاخت : بكرة علطول انا هفضيلك نفسي بإذن الله
فاطمة : خلاص تمام ومع بعض بالتليفون بقي , وشكرا جداا اختي .
الاخت : ربنا ييسر حبيبيتي وانا تحت امرك دايما .

طيب اما اقوم انا اصلي الصلوات اللي عليا وربنا يهديني
واشوف حال البيت دا ايه ..
تخرج من اوضتها تدور ع اي حد في البيت مفيش حد
ايه دا امال راحوا فين ؟؟؟؟

تتصل بماما ع الموبايل مش بترد
طيب بابا برده مش بيرد
ايه دا هو في ايه ؟
هم راحوا فين ؟ وانا مش داريانة باي حاجة كدة
ربنا يستر هروح اصلي يكونوا جم إن شاء الله
راحت تصلي والحمد لله ربنا يهديكي يا فاطمة
وقاعدة منتظرة بتفكر في الف حاجة
بس الاساسي عندها دلوقت :
1- معاد بكرة مع الأخت .
2- اهلي راحوا فين ؟ .
من كتر الانتظار دخلت نامت عشان معاد بكرة
وظبطت المنبه ع المعاد مش معاد صلاة الفجر ربنا يهديكي يا فاطمة ويفتح ع الاخت المنتقبة وتكون سبب في هدايتك _آمين _ .

وتصحي تدور عليهم الحمد لله لقتهم نايمين
كتبتلهم ورقة
انا راحة اقابل صاحبتي وجاية علطول
بنتكوا فاطمة ..

قابلت الاخت ودار الحوار الآتي :
الاخت : اهلين فاطمة حبيبيتي اخبارك ايه ؟
فاطمة : الحمد لله يا اختي ادعيلي انا حالتي النفسية زي الزفت .
الاخت : لا خير يا حبيبيتي إن شاء الله , انا ملاحظة انك مطوّلة الطرحة شوية عما شوفتك اول مرة صح ؟
فاطمة : دانا زمان كنت كدة واكتر كمان .
الاخت : إن شاء الله تبقي احسن واحسن , يلا يا قمر ندخل ف موضوعنا ها قفلتي الموبايل ؟
فاطمة : اه قفلته طول الوقت , بس انا يا اختي مش هقدر ابعد عنه انا اتعلقت به جامد وهو كمان بيحبني .
الاخت :طيب مسألتيش نفسك دا لو بيحبك بجد كان عمل فيكي كدة ؟
كان لعب بيكي كدة ؟
وسمح لنفسه ان يسوّء سُمعتك في الكلية كدة ؟
فاطمة : لا بس هو اكيد بيحبني بدليل انه اختارني انا دوناً عن بقية البنات .
الاخت : اه اختارك انتي عشان يتسلي بيكي , اصل بصي يا فاطمة يا حبيبيتي
الطفل لما بتجيبيله لعبة بيبقي في الاول مهتم بيها جدا وميستحملش عليها خدش
مرة في مرة يبتدي يسيبها في اي مكان وساعات ينساها وبعدين يبتدي يكسّر فيها بعد ما خد اللي هوا عايزه
لكن اللعبة اللي بتبقي محفوظة ومصانة مش اي ايد تتمدلها بيعد يبصلها كأنها حاجة صعب انه يوصلها هو بيحاول بس مش عارف ولما مامته تنزلها يلعب بيها بيحاسب عليها اوي لانه عارف انها ممكن تروح منه في اي وقت
* كان صعب انه يوصلها فصعب انه يفرط فيها *
فاهماني يا فاطمة ؟

فاطمة اقتنعت شوية بكلام الاخت :
بس هو وعدني انه هيرتبط بيا وهيطلبني من بابا لما نخلص الجامعة.
الاخت : ااااااااااااااااه بعد 5 سنين ؟!
فاطمة : لا 4 بس
الاخت : مفرقتش يا فاطمة 4 من 5 وايه اللي يثبتلك انه ناوي يخطبك ؟
فاطمة : حاجات كتير زي ; حبه ليا وهداياه اللي مغرقاني ورسايله ورناته وكل حاجة فيه بتثبت دا .
الاخت : كل دي اثباتات تثبت انه بيعلب بيكي يا فاطمة صدقيني يا حبيبتي .
فاطمة :

لا يا اختي هو بيحبني بس مشكلته انه مش متدين فعشان كدة مش عارف يعبر عن حبه دا بالطريقة الصح .
الاخت : اي رجل يا فاطمة مهما كان متدين او مش متدين عمره ميقبل ع شريكة حياته انها تتفضح كدة ويقبل انك تخوني اهلك عشانه صدقيني يا فاطمة دا مش بيحبك , دا لو كان بيحبك بجد كان جه وطلبك علطول من باب البيت مش من الشباك زي الحرامية .

((..... وليس البر بأن تأتوا البيوت من ظهورها ولكن البر من اتقى وأتوا البيوت من أبوابها )) البقرة - 189

فاطمة مش مقتنعة انه مش بيحبها : هو لسه مش مؤهل دلوقت للخطوبة وكدة .
الاخت : مش مؤهل يبقي يبعد عنك وميخنش اهلك وبعدين هو مش مؤهل انما انتي مؤهلة يجيلك عريس تقي يقدّرك ويكون مؤهل للمسؤلية لانك غالية ولا ايه فاطمة ؟
فاطمة مقتنعة جداا بكلام الاخت ولكن .. : طيب اعمل ايه يا اختي ؟
الاخت : انتي انتبهي لدراستك عشان خلاص لازم نبدأ نذاكر الامتحانات خلاص ولو عايزة اي حاجة اشرحهالك انا تحت امرك , وقدر الامكان كل اما تفكري في الشاب دا اشغلي نفسك وافتكري ربنا وان دا شخص بيكرهك عايز لكي الشر , ماشي نتعاهد ؟
فاطمة : ربنا يسهل
الاخت : اهم شيء هو ارادتك انتي وتزودي جداا في الطاعة وتطلبي من ربنا يعينك .
فاطمة : حاضر يا اختي انا حبيتك اوي وكلامك زي البلسم , إن شاء الله نتقابل قريب .
الاخت : إن شاء الله حبيتي وانا كمان حبيتك بس اهم حاجة انك تحبي فاطمة وتحبي لها الخير والستر ماشي يا استاذة ؟
فاطمة : ماشي ومش قادرة تبتسم .

وخلصت المقابلة

فاطمة بتفكر ف كلامها وانه مش بيحبها وبيعلب بيها وحست ان كلام الاخت صح وانها خسرت حاجات كتير اوي بسببه ,
فتلاقي التليفون يررررررن
مين ؟؟؟

الشاب المكار

وتحتار ترد ولا لأ

ارد اهزّئه واقوله متكلمنيش تاني ؟
بس يا تري هقدر ؟؟؟

ولا مردش خالص احسن ؟؟
.....
فالاتصال يقطع

تلاقي رسالة اتبعتت :
(( فاطمة انتي ليه مش بتردي ؟ انا قولتلك اسف ومش هتحايل عليكي اكتر من كدة براحتك بس افتكري انتي اللي بدئتي ..والبادي أظلم ))

فاطمة تقري وتستغرب ..انا اللي بدئت ؟ بدئت بايه ؟ هو بيهددني ولا ايه ؟
فتبدأ تخاف وتفتكر انه ممكن يئذيها
وكان لها صور معاه ايوة ساعة لما كنت معاه وقعد كل شوية يصورني وبعدين اعطي الموبايل لزميله عشان يصورنا مع بعض
يا نهاااااااااار ابيض وانا كنت زي الهبلة فعلا زي ما قال الظابط
وكمان بعتله رسايل كتير واكيد هو محتفظ بها ع الموبايل ,

طب هو كان يقصد تهديد بجد ولا قصده انه مش قادر يبعد عني
ياربي اعمل ايه ؟
والتليفون يرررن مين ؟

الاخت
الحمد لله اتصلتي في الوقت المناسب
فاطمة : السلام عليكم
الاخت : وعليكم السلام ورحمة الله وبركاته
فاطمة : الحمد لله انك اتصلتي يا اختي الحمد لله
الاخت : ها يا حبيبتي وصلتي البيت ولا لسه انا حبيت اطمن عليكي , خير حبيبيتي مالك ؟
فاطمة : لا انا لسة ف الطريق وحصل جديد كمان ف الوقت دا .
الاخت : خير ؟
فاطمة : كان بيتصل بيا وانا مردتش فبعتلي رسالة تهديد وانا خايفة منه .
الاخت : تهديد ؟؟؟؟
ازاي طمنيني يا فاطمة هو ماسك عليكي حاجة ؟
فاطمة : لا الحمد لله مفيش اي حاجة وحشة من اللي جت في دماغك , كل الموضوع اني ليا صور عنده ورسايل وخايفة يوريها لبابا او حد من البيت .
الاخت : يااااااا يا فاطمة اشمعنا دلوقت خايفة ؟ ومخفتيش ساعتها من ربنا ؟؟ ربنا اللي شايفك ومطّلع عليكي في كل مكان وزمان !!!؟؟؟
فاطمة وبتعيييييييط : الشيطان بقي يا اختي انا مش عارفة اعمل ايه ؟
الاخت : طيب نستعيذ بالله منه ونبدأ صفحة جديدة مع ربنا وخليكي ع يقين تاااااام انك طالما رجعتي لربنا وتوبتي اليه هيقف معاكي وهيبعد شر هذا الشاب عنك .
فاطمة : ونعم بالله الله يطمنك يا اختي . انا مش عارفة اشكرك ازاي .
الاخت : متقوليش كدة طبعا اهم شيء انتي طمنيني عليكي وزي ما اتفقنا بقي وانا هطمن عليكي دايما .
فاطمة : ربنا يخليكي والسلام عليكم .
الاخت : وعليكي السلام ورحمة الله وبركاته

فاطمة اطمنت من كلام الاخت
وقررت انها تتوب لله وتقاوم نفسها
وتشوف حياتها كلها اللي هي مقصرة فيها
لكن ازاي الشيطان يسبها تخد قرار قاطع زي دا ؟؟؟
فالولد يتصل ...

فاطمة : يوووووووه

وخلصت حلقتنا عند يوووووه بتاعة فاطمة
يا تري فاطمة قالتها حيرة برده وانها بتفكر ترد عليه ؟
ولا هتخد بكلام الاخت وخلاص هتقطع علاقتها به نهائي ؟
وهل هتبقي اقوي من الشيطان وهتقاوم نفسها وتختار ربنا ولا هتختار تكملة العلاقة المحرمة وطريق الضياع ؟
طيب ماما وبابا كانوا فين امبارح وايه حكايتهم ؟

هنعرف كل دا في الحلقة القادمة إن شاء الله

من طرف red rose الأحد فبراير 27, 2011 10:37 pm

قصه رائعه جدا
جزاكى الله كل خير

عجبنى فيكى لون عنيكى

عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى

رد: عجبنى فيكى لون عنيكى