رسالة من ضابط شرطة!!!!!هام

بسم الله الرحمن الرحيم

رسالة من ضابط شرطه احس اننا نتضهدهم
والامانه تقضى ان من حمل رساله عليه ايصالها فتقبولوا رساله صديقنا تحياتى للجميع رانيا
...
عزيزتى انا قررت اكتب الموضوع ده وارسله لكى انتى بالذات لان لاحظت ان صفحتك يوجد بيها الكثير من الاصدقاء ده عشان انا بحس ان صفحتك كالبيت الكبير تجمعين المعارضين والمويدين بكل شئ وارجو نشرها بالطريقه التى تحبيها
وقررت اكتب الموضوع ده عشان اعرف الناس شرطة يعني ايه واعرفكم احنا بنتعب أد أيه عشانكم ( احنا دي عشان انا ضابط شغال في الأمن المركزي برتبة ملازم يعني متخرج السنه اللي فاتت).

واكتر حاجة استفزتني عشان اكتب الموضوع ده ان قريت هنا في اايام الازمة هجوم شديد علينا في موضوع تاني واحد قال لاتبيع لضابط ولا تشتري من ضابط ولا ليك علاقة بضابط قام واحد رد عليه وقاله لأ لازم تعرف ضابط عشان يجيبلك الرخص لما تتسحب ويسلكلك أمورك دا علي أساس أن الضباط دول يهود يعني ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

القاعده العامة في الموضوع كل قاعدة وليها شواذ يعني زي ما فيه ضابط كويس فيه ضابط وحش وزي ما فيه دكتور بيعالج واحد وينقذ حياته برده فيه الدكتور اللي بيعمل عمليات اجهاض لبائعات الهوي ( والله حلوة بائعات الهوي دي ) و فيه الدكتور اللي كل همه الفلوس وفيه المهندس اللي بيغش أصل الحياة كدا خير وشر .

فأنا قولت احكيلكم شوية عن الشرطة وشهداء الشرطة عشان تحسوا بدورنا
واظن دلوقتي قدرة الشرطة واضحة لكل الناس مفيش ولا فسفوسة حشيش ولا قرص برشام ولا الهوا ( الموجود كله خلطة حنة يا بيه أه والله ).



بما ان الواجهة الحقيقة للشرطة في اي دولة في العالم هي الدوريات الأمنية و الاعمال المرورية إذا فقائدي المركبات المختلفة هم الأكثر احتكاكا بالشرطة ( حلوة قوي قائدي المركبات ) .

أنا هكمل بالعامية عشان اعبر احسن .....

يعني سيادتك من خلال تعاملك مع الإدارة العامة للمرور في مصر فانت تقدر تكون فكرة عن طبيعة الشرطة في مصر ( وضحت كدا ).

وعشان احنا في مصر ما ينفعش تطبق المعيار دا علينا (لييييييييييييييه بس ما انت كنت ماشي كويس ) أقول انا لسيادتك ليه .....
1- أسوء فئات المجتمع السواقين بلا أدني شك ( وكل قاعدة وليه استثناء طبعا )

2- الحالة العامة للمجتمع المصري و الحاجات الغريبة اللي بنشوفها وانحطاط الأخلاق والفهلوة والفكاكة ( والأخيرة دي من أيام الفراعنة ) يعني كل عيوب الشعب المصري بتظهر في الشارع يعني تقدر تقول الواحد وهو نازل الشارع بينزل وهو مشغل كل الأبوشنات الغلط اللي فيه .

3- العصبية والتوتر عشان الحالة المادية الزفت للغالبية.

4- الاحساس الدائم ان مفيش قانون والفهلوة دائما هي الحل الأمثل

5- الاحساس بان يعني ايه حتة ضابط قد عيالي ولا في سني أو أمين فلاح ولا عسكري ملوش لازمة يوقفني ويتنطط عليا .

6- الحالة المادية الصعبة لأفراد الشرطة بسبب المرتبات بتخليهم يمشوها تسليك ( الأفراد حاجة و الضباط حاجة تانية خالص فرد يعني أمين أو درجة أولي ودي فيها رتب كتير زي صف ضابط وصول ومندوب وحاجات تانية كتير ودرجة تانية ودول المجندين )*

7- ودي حاجة محدش واخد باله منها العجز في عدد الضباط وما يترتب عليه من زيادة ساعات العمل للضابط ( أنا مثلا العادي بتاعي في اليوم 16 ساعة ويومين في الاسبوع مقفلين ببات فيهم في القطاع ) بس دي مش مشكلة من أيام الكلية واحنا متعودين علي المجهود العالي وساعات نوم قليلة يعني مش مشكلة قوي بس يؤخذ بيها برده وتوضع في الاعتبار .


كفاية كدا ............


نحكي أول حكاية وهي لاتنين شهدا ( كما رواها في محاضرة لنا في كلية الشرطة السيد اللواء صلاح الدين الشربيني مدير الإدارة العامة للعمليات الخاصة )
شهداء العملية : الشهيد لواء / محمود عادل
الشهيد عقيد / عمرو عبد المنعم
المكان: جبل الحلال - سيناء
التوقيت : صيف 2007
المأمورية : تكليف قطاع العمليات الخاصة بالتعامل مع بؤرتين ارهابيتين واقعتين في جبل الحلال مؤكد تورطهم في تفجيرات شرم الشيخ .
المعلومات المتاحة : ( المعلومات دي بيجبها ضباط البحث الجنائي وأمن الدولة ) أعداد الأرهابيين غير محددة و تفوق 15 فرد قاموا بتلغيم الجبل ولديهم كميات كبيرة من السلاح الألي والقنابل اليدوية والذخيرة ( شوفت الارهاب وصل لأيه قنابل والغام يعني ملغمين جبل كامل انتوا متخيلين الكلام ده ولا احنا بنأذن في مالطا ).

العملية : تم اعداد خطة التعامل بناء علي المعلومات السابقة وبناء علي مشاهدات مجموعة الاستطلاع التي ذهبت لموقع العملية قبل التنفيذ تقريبا باسبوع وكانت أهداف الخطة كالأتي :
1- تمشيط منطقة جبل الحلال بالكامل من الألغام
2- مطاردة الارهابين الموجودين في الجبل.
وتم تنفيذ الخطة كما رسمت حيث استمرت عملية تمشط الجبل 3 أيام كانت عملية التمشيط تتم صباحا و السكون ليلا في القول الأمني ( القول ده لفظ بنقولة علي أي مجموعة منظمة بشكل معين سواء كانت أشخاص أو فصائل أو مدرعات )
وبالفعل وأثناء عملية التمشيط وكما هو متوقع تم واكتشاف البؤرتين وتم التعامل معهم وتصفيتهم بنجاح تام .
رأت قيادات العملية الأستمرار في الجبل لفترة زمنية أخري أستكمالا لعملية تمشبط الجبل والبحث عن أي مشتبه فيهم وبالفعل تم الاستمرار وأثناء سير القول الأمني في المدقات الجبلية انفجر لغم في المدرعة المتقدمة من جهة اليمين لم يسفر عن اصابات .
وفي مثل هذه الحالات يتم اخلاء القوات من المدرعات ونزولها علي هيئة دفاع دائري وأثناء هذه العملية واثناء التتميم علي القوات انفجر لغم أخر أسفر عن استشهاد الشهيد لواء محمود عادل والشهيد عقيد عمرو عبد المنعم .
وتصادف أن يو م استشهاد الشهيد لواء محمود عادل هو يوم عيد ميلاد ابنته الوحيدة و قد كانت الأسرة في انتظار عودته ولكن بدلا من أن يدخل علي أسرته حاملا هدية لأبنته دخل بدل منه خبر استشهاده حاملا نبأ دخوله الجنة .

ملحوظة >>>>>>>>>> في معلومات لم تذكر وكذلك أحداث أخري كذلك حفاظا علي السرية ( بس أنا عارفها )

اللـــــــــــــهم ارزقـــــــــــــــــــــني الشـــــــــــــــــــــــــــــــــــــــهادة


في النهاية احب اشكر ذلك الضابط الذي اراد ان يوضح جزء من مهام الشرطة ودورهم الذي تم تشويه كيانه القوي
ثانيا احب اخبرر الجميع ان هذا البلد لن تقوم لها قومة الا بعد ان يعود اليها الامن ولن يعود اليها الامن الا اذا تغيرت نظرت الشعب لهذا الجهاز الذي اصبح مثل الامرأة سيئة السمعة سيرتها على كل لسان يا جماعة عذرا لازم كلنا نرجع نحترم الشرطة ونديها حقها
دليل على انعدام الثقة في ضباط الشرطة
وسط ميدان التحرير سيارة تسير بدون اوراق ولا اي لوحات معدنية وعندما استوقفه رجل المرور وطلب منه اوراقه خرج اليه السائق رافعا يديه عليه والتم اكثر من متظاهر وانضموا لصف السائق وتوالوا بالضرب على عسكري المرور المسكينن دون ان يسمعوا لاي كلمة واحدة من ذلك العسكري الغلبان الذي راح ضحية لغلطة رؤسائه وهمجية واستغلال مجموعة من الشعب
جهاز الشرطة المحترم لك احترامي ولا ننسى ذلك الضابط الرائع في اواخر عام 2010 ابن الشرقية كفر صقر الذي رفض 15 مليون دولار لتهريب مسلة فرعونية
متى يعود لجهاز الشرطة كرامته متى يعود له كيانه


حاجة غريبة احب اقولكم عليها بقى
والله من احد الاشخاص ميسورين الحال قالها بعد قضايا الكسب المشروع وسرقة اموال البلاد يقولها لي الان اصبحت اشعر انني عندما اسير في الشارع بسيارتي اشعر ان الجميع ينظرون الي نظرة الحرامي والله لقد قال ذلك بالحرف قائلا نحن شعب يريد التغيير ولكن ينسى ان يتغير

في النهاية اريد ان اقرر عليكم مقولة دكتور طلعت عويس عندما قال

كل البشر لهو اذنان ولسان لكي ينصتوا اكثر من ان يتكلموا
لكن شعب مصر له لسان واذن مقطوعة واذن اخرى صماء ولا احد يسمع بل الاكثر من ذلك انهم جميعا يتحدثوا في صوت واحد دون ان ان تميز من يتكلم يعني زي ما بتقول العامية هيصة

على فكرة احنا بنبطل كلام في وقتين اتنين بس لما نكون تعبنا وعايزين نشرب عشان نقدر نكمل الكلام ولما نموت
والمفروض اقول لما ينام لكن المصري الوحيد هو الي بينام وهو بيتكلم برضوا ههههههه معلش طولت عليكم

رسالة من ضابط شرطة
قد وصلت الرسالة ياسيدى

الرساله اكيد وصلت من زمان ..
واكيد كل حاجه فيها الحلو والوحش بس ياريت الناس تفهم كده..لكن ديما يقولوا" الحنسه بتخص والسيئه بتعم " العباره اللى بنعانى منها.

واحب اكرر المقوله دى تانى

كل البشر لهو اذنان ولسان لكي ينصتوا اكثر من ان يتكلموا
لكن شعب مصر له لسان واذن مقطوعة واذن اخرى صماء ولا احد يسمع بل الاكثر من ذلك انهم جميعا يتحدثوا في صوت واحد دون ان ان تميز من يتكلم
.........
ربنا يهديهم يارب